老早报纸哪能出版

◆ 刘其舜

每天看报，老里八早报纸是哪能印出来，侬晓得口伐？

我迭个老头子，年轻辰光，搭报纸还有点缘分，当过一段辰光编辑，还晓得一眼眼。

先从老里八早个作者写文章讲起。伊拉侪是用笔一个字一个字写勒拉文稿纸浪，一张文稿纸浪有500个格子，所以有作者戏称自家是勒“爬格子”。写好了，乃末，开信封。最初邮寄投稿勿需要勒信封浪贴邮票，只要剪脱信封一只角，信封浪写“稿件”就可以了。后来，本地要贴一分五厘个邮票，外地要贴三分邮票，迭个侪是作为印刷品来邮寄嗰。摆到现在，已经呒没几个作者还用笔搭仔文稿纸来写稿了。就像现在《夜光杯》美文征集活动，也是要求用Word文档投稿，侪是用电脑来“写”文稿了。现在也勿需要贴邮票了，打开电脑，点击一下“伊妹儿”，马上发到编辑个信箱了。老早，编辑要勒拉文稿边浪用红笔修改，现在，编辑就可以勒拉电脑上头修改了。搿样子，编辑改稿也便当多了。

老早编辑修改好一篇稿子，就要让排字工人去排字。排字工人对照文稿，从字库里向拣出一个个铅字。迭个字还要分字体、字号大小，排字工人没有一点好眼力、好记性，也是老难嗰！接着用涂料涂抹在铅字上，用一张白纸去拓印，再交拨编辑，编辑勒拉迭张样稿上头再修改。有个辰光，时间性勿是老紧嗰，编辑还会拿修改以后个铅字样稿寄拨作者，征求作者对修改个意见。一篇篇文稿修改好了，再拼成版面。

老早辰光，好多《新民晚报》编辑侪是深入到排字车间里向，排字工人一排好，就马上勒车间里审阅、修改，就为了抓紧时间，保证勒拉当天下午能及时出版。

迭个只是一篇稿子，所有文稿侪审核好了，再交拨排字工人统排。搿辰光，就要讲究字体了，比如标题一般用黑体，正文用仿宋体搭仔楷体。报纸编辑当中还有一句行话：“无楷勿活”。意思就是一个版面，如果全部侪是仿宋体，看起来不适意。《夜光杯》里个“灯花”专栏，就一直用楷体。《夜光杯》个版面还有自家特色，比较一下其他报纸，左右上下，勿是一般长方形，有辰光是交叉嗰。文稿中一小块字数也有多少，对排字工人又带来了难度；还有字个大小，有一号、二号直至五号。铅字磨损了，专门还有工人浇制刻印铅字，大家想想看，排字工人多少吃力啊！

所有排好铅字个文稿侪要放到一个木框里，再用插金属片个方式调整行距，标题行距大，正文行距小。

最后成稿了，再用白纸拓印，成为一张样张，编辑再审核。全部通过以后，做成印刷制版所用个胶片，就可以开机印刷报纸了。

当然，现在个报纸从编辑、排版到印刷，数据侪勒电脑里制作、传输，读者除脱可以订阅纸质报刊，还可以通过电脑、手机看电子报，实在是方便多了。