品味芦笋需惜时

◆ 沈一珠

到底啥辰光算是进入春天？

春天真式是老老短嗰。侬看喏，气象局还勒跟老百姓扳道理，到底啥辰光算是进入春天呢？专家讲个是数据，近点嗰三年五年，远点嗰十年廿年，大数据自有伊个四平八稳；老百姓讲个是体感口感，动一动就出汗，各购物平台浪新推一大堆紫雪糕冰淇淋；各讲各个道理，结论还呒没出来，马路上怕热嗰已经短袖短裤穿出来了，当然也有穿件薄棉袄，煞西要坚守“春捂秋冻”老法则个人——勿好意思，看得人热煞。

前两天买了芦笋，按道理讲，三四月份个芦笋还算嫩，质地软糯，吃口清爽。汏清爽，扚脱点老根，用热油炒一炒顶好。所以，搿天个吃法是培根炒芦笋。培根切成一寸左右小段，芦笋切好滚刀块，也是一寸左右。扚下来个芦笋也覅浪费，直接摆水烧成高汤好了，清香味道里带一点清凉感。

炒芦笋有一个窍开，切好个芦笋水里浸一歇。一是可以泡脱点苦涩味道；二是因为摆了一两天甚至更长日脚个芦笋，斜气容易因为水分蒸发而变得掼头搭脑。浸泡后个芦笋因为吸进水分会重新变得新鲜又充满活力。

油镬里喷一点点油，培根摆下去，煸出香味道和油脂之后，沥干个芦笋摆下去，一道翻炒到芦笋断生，摆一点点盐就好。

搿天吃芦笋个体会是，小菜个春天也老短，因为个别芦笋吃起来已经有点老了。

葛末就调种吃法，丝带芦笋。

先拿嫩头切下来，用来清炒或拌色拉；剩下个芦笋茎平放勒砧礅板浪，刨子竖着拉，拿芦笋刨成“丝带”，同上理，立即摆进水里浸泡片刻，再沥干备用；拉刨子速度要快，一气呵成，速度慢了，会影响“丝带”个丝滑程度。开油镬，丝带芦笋倒下去，快速翻炒到断生，摆点盐合好味道就好。

一定有人欢喜先摆点蒜末和红辣椒爆香，再炒芦笋；最后再加点胡椒粉或是淋点鲜酱油调味。我还是觉得，新鲜蔬菜一定要少摆调料，让伊自带个鲜香味道充分体现出来。