“阳春面”搭仔“过桥面”

微信扫码看视频听钱程沪语朗读

◆ 储有明

鲁迅先生生命当中最后十年，住辣辣上海虹口个公共租界里向；伊为自家个书斋起名“且介亭”，“且介”取自“租界”两个字各一半，意思是半租界个小房间。鲁迅先生冷眼看租界里向个芸芸众生，尔虞我诈，逐利而来。伊辣辣一篇文章当中写到，当年上海租界里向个跑街先生，每天夜里睏觉前，侪要拿日里穿个一条西装裤子，按照熨烫个纹路，小心翼翼折叠好；放到枕头下面，等到第二天一早穿个辰光，两条烫缝仍旧笔笔挺。

旧上海灯红酒绿，夜夜笙歌，夜市面斜气足。大清老早辣辣马路浪急吼吼跑来跑去个，侪是跑街先生搭仔掮客。以棉布行个掮客搭仔跑街先生为例，伊拉先要到杨树浦各大棉布厂去接单子，拿布样，随身带个皮包里侪是一块块像扑克牌大小个花布样品，四边切割得像狗牙齿咬过一样。接到单子以后，豪叜要赶到南京路个宝大祥、协大祥搭仔信大祥去上门推销；慢一步，说勿定生意就会得拨同行抢脱。

饿着肚皮是跑勿动个，要吃饱肚皮，最快最便宜个办法就是吃面。老底子静安寺路（今南京西路)梅白格路（今新昌路）口，有一爿锡帮面店“又一村”，每天早浪侪是跑街先生搭仔掮客个市面。

跑街先生做生意，大清老早起来要讨口采，讲闲话听闲话侪要图个吉利；大清老早起来最怕听到个字眼就是“光”，如果到又一村面馆搭堂倌讲：“来一碗光面。”一、勿吉利。两、顶怕人家讲浇头也吃勿起，穷得来精打光。因此呢伊拉拿苏州人嘴巴里向个“光面”改叫成“阳春面”。

因为锡帮面馆讲究面汤要清，所以勿做“红汤面”，也就是汤里从来勿摆酱油个。大冷天，一碗宽汤重香头个清汤面端上台子，油花飘辣辣面汤浪向，猪油喷喷香，葱花碧碧绿，汤个颜色白里透青，热气腾腾，春意浓浓，吃到嘴巴里，暖到心里向，赛过“十月小阳春”。“阳春面”就是迭能拨跑街先生搭仔掮客叫出名堂来个。

跑街先生白天做生意赚着点小钞票，夜里向欢喜一家头到面店里向吃吃小老酒，舍得多花一眼铜钿叫一碗热炒浇头面，譬如：炒猪肝、炒腰花、炒鳝糊咾啥。叫堂倌先上浇头，温个二三两老酒，吃一口浇头，渳一口老酒。老酒吃好，再叫堂倌上一碗阳春面，拿剩下来个浇头搭子汤汁拌辣辣面里向。一只浇头派两趟用场：先过老酒再吃面。搿种吃法传开来以后，堂倌就拿伊简称为“过浇面”，谐音“过桥面”。

上海滩面店里向个切口——“阳春面”搭仔“过桥面”就是迭能传开来个。