早春尝鲜炒双笋

◆ 沈一珠

有辰光想想，就算是吃了一辈子个家常小菜，也要因时而宜、顺势而为。

比方讲，搿两天想吃炒双笋了，竹笋、香莴笋，是春天刚刚发芽、或者刚刚窜出嫩头个时令小菜，也是百吃勿厌个家常。隔日夜里就买好了迭个两样，第二天早上7点半就送来了；一看就觉得着，竹笋还好，至少笋身上带仔湿漉漉个黄泥，切上去也还带点沙沙个爽脆声；香莴笋明显勿来三，去脱叶子后，摸上去硬梆梆，先削脱厚厚一层外皮，再刨除两层茎茎拉拉个，还是硬结结——现在个香莴笋常常带有一种宁折勿弯个气质了？轧轧苗头，假使坚持从前个滚刀块，刮辣生脆个口感可能会打折扣，要么切片？或者干脆切丝？

最终还是决定切丝。笋剥脱壳，切段，水里焯一焯，要祛除草酸，不过，刚刚断生就好，辰光长了，鲜味道侪走光，勿舍得；冷水里激一激，细细交切成丝，备用；香莴笋就用刨子刨，一歇歇工夫，一盆长长短短个香莴笋丝，一律像自来火梗一样粗细，看上去斜气适意。

对业余选手来讲，备点厨房工具蛮要紧，比方，有一把挑泥肠个不锈刚小刀，细细长长带弧度个刀身，上头带一小截齿口，用起来老趁手；再比方，一只白色陶瓷磨蓉器，长得像肥皂缸一样，姜蓉蒜蓉随用随磨，比用刀切要省力交关。记得还是一个初次见面个小朋友送个，伊齐巧从欧洲带回来个，老温馨个小礼物。

炒双笋，吃个就是春天里新鲜水嫩之余个清淡爽脆，所以要尽量少摆调料，免得抢菜个风头。开油镬，笋丝先摆下去翻炒均匀，香莴笋丝摆下去，继续翻一翻，摆盐、糖合好咸淡，假使欢喜更加爽脆个，出锅要快，一共一分半钟就差勿多了；假使欢喜水份多点，出锅前淋一点点清水，再多烧半分钟。当然，假使侬也齐巧碰着一根宁折不弯个香莴笋，建议可以多烧1分钟。

如此顺势而为，从滚刀块调到切丝，一只从小吃到大个炒双笋，勒2025年个早春，偏生吃出一股“丝丝杨柳风，点点梨花雨”个味道。