三本护照见证半生行旅

◆ 冯济民

老护照到期了，我去换领新护照，只隔了5天就收到了。搿是我个第三本护照。勿得勿讲，现在个办事效率的确是高。

护照是出国必备个身份证明。我个第一本护照是工作辰光办个公务普通护照，上头有两趟出国记录。第一趟是2007年10月，受上海市港口局委派，随上海港代表团去日本友好港口福冈港进行访问。迭趟除脱福冈港，还去了大阪、神户、长崎、东京等地，考察调研当地港口。第二趟是2008年5月，随中国航海博物馆（筹）代表团去美国、加拿大考察航海类博物馆。迭趟阿拉一共考察了12家博物馆。我一路考察，一路记录，回来写个考察报告还作为论文辣了国际博物馆协会下属个博物馆学委员会2008年年会浪发表。迭本护照过期后，封底剪角作废，拨我收藏留念。

第二本护照是私人普通护照。2013年9月，定居美国个大姨邀请我搭妻子去旅游。迭个是我第二趟去美国。第一趟去美国，公务考察任务安排得满满当当，来去匆匆。迭趟就轻松交关，辰光也斜气充裕，阿拉从美国西海岸旧金山入境，一路向东，一路游览，经过华盛顿，一直到纽约，再乘邮轮出海，到巴哈马白相了一圈。迭趟旅行激发了我对旅行个兴趣，迭本护照浪也就有了越来越多个记录。越南、日本、澳大利亚、新西兰、德国、匈牙利、奥地利、捷克、斯洛伐克、克罗地亚、波黑、斯洛文尼亚、法国、意大利、梵蒂冈、瑞士、俄罗斯、挪威、丹麦、瑞典、芬兰。虽然只是走马观花，但是勿一样个历史文化搭仔风土人情，还是拨我留下了斜气美好个回忆。

第二本护照十年期满。现在，我又换领了全新个第三本护照。迭也是为了有备无患，方便来一场说走就走个旅行。伊个有效期到2034年12月，到埃歇辰光，我已经是86岁个耄耋老人了。

三本护照叠放整齐，我忽然意识到伊拉勿仅是出入境个身份证件，也是时代个切片：从港口建设个时代印记，到环游世界个黄金十年，再到银发旅者个品质旅行，每个时期个护照里侪有国家发展与个人命运个剪影。一张张签证页搭仔机票存根，终将成为献给未来个时光胶囊。