“跑单”与“跑单帮”

微信扫码看视频听钱程沪语朗读

◆ 储有明

现在，阿拉上海个快递行业发展得交关快，快递员多劳多得，跑单越多，收入就越高。“跑单”已经成了使用频率越来越高的新名词。好白相个是，上世纪三四十年代，阿拉上海曾经出现过一个叫“跑单帮”个职业，跟现在个“跑单”只有一字之差。

当时淞沪会战刚刚结束，上海公共租界搭仔法租界四周被日本侵略者占领区包围，变成了“孤岛”。因为遭到封锁，租界里向个食品供应交关紧张；同时，租界里向生产出来个香烟、肥皂、花布、自来火等商品也呒没办法大批量卖出去。面对搿种情况，“跑单帮”应运而生了。

“单帮”就是“单人商帮”个意思。中国历史浪有“十大商帮”，像“山西商帮”“徽州商帮”“宁波商帮”“龙游商帮”等等，拿甲地生产个土特产，运到乙地方去加价卖脱，赚点差价。一般商帮侪是集体行动，抱团取暖。不过日本侵略者怕抗日武装以商队名义活动，对人数较多个商队严查特查，对单人带货个商队眼开眼闭。

晓得了迭个“窍槛”以后，做货运贸易个人侪开始单独带货，“跑单帮”就此出现。沪剧《芦荡火种》里，胡传葵问阿庆嫂：“阿庆到啥地方去啦？”阿庆嫂回答：“伊到上海跑单帮去了！”

后来，日本侵略者又担心男单帮里向有游击队、新四军，经常突击抽查，搞得男单帮生意难做。对女单帮呢，相对就宽松多了。搿能一来，男单帮越来越少，女单帮越来越多。

当时上海租界里向老百姓每天吃个物事，勿少侪是靠女单帮运进来个，女单帮也就成了跟市民生活密切相关个话题。当时有位辣报纸浪向写连载小说个言情小说家，叫冯玉奇，就辣小说里向写到过女单帮个生活。

埃歇辰光，阿拉上海个地方戏“申曲”刚刚从“对子戏”“同场戏”过渡到“幕表戏”。沪剧名伶施春轩领衔个“施家班”瞄准迭个时机，编演了一出新戏，叫《女单帮》，讲个是杭州女单帮舒丽娟搭仔大学生沈志春个爱恨情仇。搿出戏由丁是娥设计唱腔，并且出演女主角舒丽娟。连演两场，盛况空前。从第三场演出开始，改由施春轩个义女筱文韵主演，再加上施春轩、沈侠民、杨云霞、赵云鸣等名伶加盟，演出照样火爆得不得了。从第一本起，一边演出，一边听观众反映，再根据反馈进行修改，经过加戏、加情节、加角色，一路演到第六本，还请来当时红得发紫个石筱英加盟。《女单帮》连演七八个月，场场爆满，成了沪剧演出史上个一段佳话。