香乌笋尖炒蛋

◆ 沈一珠

像阿拉迭种，出去工作带白相，回转去前头兜兜当地小菜场个，应该也蛮少个。当时还觉着有点奇奇怪怪，后来想想，也是从来勿曾有过个体验，斜气有意思。

小菜场是露天个，主要是卖当地种出来个新鲜蔬菜。小菜品种跟上海大同小异，吃价个是本地出产。一边走一边看，一歇歇有人伸手拦牢问，阿要带把大蒜回去口伐？一歇歇一条声音插进来：象山小土豆要勿啦？也有人会实话实讲，迭个蒜薹勿是本地个，要勿要侬自家看。

就看到迭能一堆象山香乌笋了，瘦瘦小小个，叶子基本上去脱了，就头头子上留点尖。摊主也是个象山当地人，闲话勿多，动作极快，一歇歇工夫，削好三根，一个女人拎好仔走了——看上去质地绵密、碧绿生青。

从前上海也有本地香乌笋，圆头叶子，短短胖胖，顶多两虎口长，色如翡翠，吃口细腻，切丝或者切片，用盐擦一擦，汏清爽捏干，摆点糖，淋点葱油拌一拌，清清爽爽，是大热天个美味。香乌笋叶子切小，用盐捏一捏，烧一镬咸酸饭，真真是生命中个勿可或缺。可惜现在看大勿到，市面上大部分香乌笋侪长一码大一码，一根香乌笋可以炒两碗，至于香味道，像稀释过个。

搿天买了七八根香乌笋，因为要带回上海，怕水分跑脱，所以，覅伊削皮，两块五角一斤，总共付了多少钞票倒忘记了。

幸亏多买了几根香乌笋，回来个车子上除脱听仔交关故事，还学着一只菜，香乌笋尖炒蛋。

拿香乌笋尖带叶子部分掐下来——从前迭部分叶子是随手厾脱个，现在想想倒是可惜了——用盐腌五六分钟，汏清爽沥干，切碎备用；两三只草鸡蛋，加料酒、盐打匀；开油镬，烧到七八分热，蛋液倒下去，划散，等有点结起来就盛出；镬子里个剩油再烧热，香乌笋尖摆下去稍稍翻炒一记，然后蛋摆下去，一道翻炒均匀就可以盛起来吃了。