热炒半卖“五味斋”

微信扫码看视频听钱程沪语朗读

◆ 储有明

经典滑稽戏《满园春色》取材于人民饭店服务标兵桑钟焙个先进事迹。桑钟焙最早是苏锡帮饮食店“五味斋”个服务领班。最早迭家店开辣辣南京西路新世界百货商厦个西首、华侨饭店个东首，搭喜来临西餐馆是贴隔壁。店个规模比较小，只有一开间门面；楼上楼下两层楼，只有散座，呒没包房；一天五巿，从早点到夜宵，供应面点糕团搭仔热炒冷盆。

桑钟焙成为服务行业个标兵以后，“一人出名，全店升级”；由黄浦区饮食公司拿迭家店调剂到大光明电影院西首，与原来光明饮食店合并，成为有六开间门面个人民饭店；两楼包房宴席，楼下散座小吃。借仔滑稽戏《满园春色》连演连满个劲头，人民饭店天天吃客爆满。

上世纪50年代初，南京西路、西藏中路一带，是上海戏院、电影院顶顶集中个地方。勿但有大光明、大上海、和平、红旗等电影院，还有长江剧场、五星剧场搭仔专门演滑稽戏个天宫剧场；新世界百货二楼还有绿宝剧场、中百一店五楼个大新游乐场……每天夜里靠十点钟夜戏散场，五味斋、喜来临侪轧满等吃夜宵个吃客。

桑钟焙最大个本事就是能见貌辨色，让每一个进店个吃客侪高兴而来，满意而归，吃得乐惠开心。据说夜宵供应个热炒菜肴可以半份起卖，就是伊第一个发明个。因为夜戏散场进店吃夜宵个顾客当中，有勿少侪是成双成对个年轻情侣。要让掏腰包买单个男顾客少花冤枉铜钿，又能够吃得有面子，桑师傅往往会得向伊拉推荐热炒半卖：就是买半盆炒猪肝，或者炒腰花、炒鳝丝、炒虾仁，另外再加两碗阳春面或者雪菜面、辣酱面。花一半个铜钿，搭买两碗双浇面个价钿差勿多。

热炒菜肴半卖还方便了勿少吃夜宵欢喜渳一口老酒个吃客。老底子辣辣五味斋堂吃黄酒最低计量单位是“一盒”，相当于二两半。吃客进店，先来一份热炒半卖，再温一盒花雕；老酒吃好，最后来一碗紧汤免青阳春面，拿呒没吃完个炒菜搭仔汤汁拌辣辣面里向，味道覅忒好噢！