三五牌台钟怀旧

◆ 冯济民

有段辰光，三五牌台钟、永久牌脚踏车、蜜蜂牌缝纫机、上海牌手表、红灯牌收音机是上海人结婚必备个“五大件”。我屋里有一只三五牌台钟就是85年前爷娘结婚辰光买个。

从我有记忆开始，迭只台钟就一直摆辣房间里五斗橱浪，从来呒没调过地方。日复一日，年复一年，每逢整点，伊总会发出清脆悦耳个报时声。爷娘去世以后，迭只台钟仍旧摆辣老家个五斗橱浪。

我最近整理旧物，发现伊已经停摆，玻璃面罩也勿晓得啥辰光落脱了。我打开台钟个后门，看见门里向贴仔一张标贴，纸张虽已泛黄，字迹依然清晰。上头印有厂家地址电话搭仔详细个使用方法，让人一看就懂。还有一句顺口溜广告语：“挂歪摆歪，虽歪不停，倒拨顺拨，一拨就准。”拿三五牌台钟个特点表达得斜气生动。

我还辣钟里寻到2张当年个修理单据。一张是1965年6月14日，淮海中路上海钟表商店个单据。另外一张是1966年7月3日，淮海中路昌明钟表商店个单据。上面写个侪是阿爸个名字。

我想要拿伊修好，三五牌台钟曾经是国内知名品牌，到了现在，仍旧有厂家生产迭个品牌个钟表。我从网络浪向寻到厂家门店地址，乘坐地铁9号线到肇嘉浜路站下车，寻到修理部，一位姓赵个老师傅接待了我。老赵师傅已经七十多岁了，一看就是有丰富修钟经验个老法师。伊接过台钟拆开一看，告诉我发条断脱了，机芯也要清洗加油。玻璃面罩需要寻找合适个才能配置，但勿一定寻得着。因为是老古董了，修理价钿蛮贵个，要好几百元。我听伊讲能够修好，马上一口答应。

过仔两个礼拜，我再次来到修理部，仍旧是老赵师傅当班。伊拿出修好个台钟交拨我。伊讲，迭只钟年纪虽大，机芯也老早就停产了，但质量斜气好，经过清洗加油，走得斜气准。玻璃面罩也寻到一只合适个装上了，修旧如旧。

又听到台钟发出熟悉个嘀嗒声，我心里斜气开心。回到屋里，我拿搿只台钟揩得干干净净，摆辣靠墙个台面浪。每当报时钟声响起，我好像又回到了当年搭阿爸姆妈弟弟生活辣一道个辰光，一种温暖个情绪油然而生。

三五牌台钟勿愧是享誉百年、著名个民族老品牌。“85岁”个老钟，上一次发条仍旧可以走满14天，而且分秒勿差，实在令人佩服。辣修理部里，我还看见好几只已经修好个老旧台钟，想来也侪是像我迭能个老人送来修个。辣现在个年轻人眼里，搿眼旧钟侪是应该掼脱个垃圾了。但辣阿拉搿辈人心里仍旧是个宝，勿惜花大价钿拿伊修好。