踢毽子

◆小 申

前一腔有篇文章提到老早流行踢毽子，一记头想起小辰光搭踢毽子有关个事体来。

埃个辰光弄堂里踢毽子，侪欢喜“花式计数”，就是按照既定个花式踢法，看啥人先完成应踢个只数；所谓个“花式”有七八种之多。记得第一式叫“荡”，单脚勿着地连续踢；第二式叫“援”，双脚轮流各踢一次算一只；然后，“拐”是用脚背外侧踢，“撞”是用脚馒头（膝盖）以上部分来踢，“遒”是用脚背正面垫踢；花样经老多个。最后一式叫“打掼”，要辣一只脚跳起来后，用另外一只脚朝后踢起高抛下落个毽子，迭个难度相当大，如果有本事连续“打掼”，肯定就是高手了。一般每一式要完成十只，半当中毽子落地，就失去搿一轮踢个资格；等下一次再轮到，可以连牢前次中断个地方继续计数，譬如从“四援”“六撞”开始。

文章里还讲道：“毽子需要自己动手做”，搿也是实情。当时厂家侪是按照上级安排个计划进行生产，而能排进生产计划个侪是生活必需品，所以商店里根本就呒没毽子搿种商品。其实做毽子并勿困难：鹅毛管一头剪成四五瓣，穿进有洞眼个铜板里，摊开剪开个部分再覆一只呒没洞眼个铜板，外头用布头缝好，然后辣立起来个鹅毛管里插上公鸡尾巴浪个羽毛，一只毽子就做好了。但是埃个辰光，鹅毛管、公鸡毛、旧铜板三样物事侪勿是轻易好寻到个。城里看勿到白乌龟（鹅），养鸡人家勿养公鸡，有洞眼个铜板起码是清朝个，一般人家屋里老早寻勿着了；至于用替代品，塑料管忒软，母鸡毛忒短，勿用铜板做出来个毽子忒轻。有辰光偶然觅到一样，也勿一定配得齐另外两样，所以小辰光啥人有只毽子也是蛮稀奇个。