卓别林搭上海个缘分

微信扫码看视频听钱程沪语朗读

◆周钰栋

卓别林迭个英国人覅讲是喜剧界了，全世界侪晓得伊个大名，用现在小青年个闲话讲，伊就是国际顶流里向顶顶灵光个，名气覅忒响噢。1930年，梅兰芳去美国唱戏个辰光就搭伊认得了，两位大师一碰头，斜气投缘。辣辣1936年3月9日，伊环球旅行正好经过上海，虽然只停留一日一夜，但是日程排得比上班还要紧凑，简直是三班倒。

搿天一早，伊先兜了一大圈看上海市容，之后又跟梅兰芳、刘海粟、胡蝶搿帮艺术家碰头，末脚还特地跑到江湾、吴淞去凭吊“一·二八”抗战纪念地，表情也严肃了交关。到了夜到更加是勿停歇。五点半赶到花园饭店，参加上海文艺界为伊办个茶话会。六点半又赶场子到国际饭店，万国艺术集社个晚宴等牢伊辣海，有胡蝶等艺术家作陪，酒杯是碰得叮当响。

晚宴一结束，梅兰芳陪伊去共舞台，看京戏《火烧红莲寺》。台浪演员文武双全，唱得字正腔圆，舞台背景变来变去像变戏法，卓别林看得连连拍手。看完还勿够，中旅社个徐桂良先生又陪伊赶到星光大戏院，看马连良演个《法门寺》。伊看得入迷了，一只手辣辣脚馒头浪打拍子，搭台下个观众一道喝彩。散场以后，伊还特地跟呒没卸妆个马连良合影。告别个辰光，伊居然还会得作揖，看来伊倒蛮懂中国礼节个。从星光大戏院出来，伊又到百乐门舞厅跳舞，一直跳到第二天个凌晨3点钟，再回到华懋饭店（现在个和平饭店）困觉，真是精力旺盛得勿得了。

第二天早浪醒来，伊一眼就看见房间里个绣花丝绸窗帘搭仔被单。伊就问：搿眼物事啥地方有得卖？等伊晓得搿眼面料是老介福个牌子，马上叫人去订，而且一订就是60件真丝衬衫。

同年5月，卓别林居然又来上海了。当伊听说4月份上海电影院刚刚放映过《摩登时代》迭部伊自导自演个电影，而且场场爆满，一票难求，伊开心得勿得了。

时光匆匆，89年以后，由卓别林女儿维多利亚创作、孙女主演个《钟声与魔咒》将辣辣上海YOUNG剧场秋冬演出季上演。侬看卓别林一家门跟上海个缘分比老上海个弄堂还要深，真是叫人叹服。