文明新戏与方言话剧

◆储有明

上海人民艺术剧院以擅长表演标准国语版个话剧享誉艺坛。不过，辣辣上世纪六十年代初，名导演黄佐临担任剧院领导个辰光，“上海人艺”还演过滑稽戏搭仔方言话剧。当时“上海人艺”有三个剧团：除话剧团外，还有方言话剧团搭仔滑稽剧团。

顾名思义，方言话剧就是根据剧中人物个籍贯，用各地方勿同个方言来演绎剧情、塑造人物个。以经典方言话剧《啼笑因缘》为例：剧中人物沈凤喜搭仔伊个姆妈、家人，讲个侪是“京味”十足个“京片子”，樊家树讲一口南方腔个杭州官话，关寿峰、关秀姑父女搭仔军阀“刘大帅”讲个是地地道道个山东方言……全剧充满了五方杂处个地域风貌特色，搭仔浓郁个时代气息。

方言话剧辣辣上世纪五十年代，一度被称为“通俗话剧”；再之前，被称为“文明新戏”。伊个历史比标准国语版个话剧还要早，甚至于可以讲是现代话剧个老祖宗。中国电影最早个两位导演陈正秋搭仔张石川，侪是从文明新戏转行从事演戏搭仔电影导演事业个。

据凤子主编个《中国话剧运动五十年史料集》记载：1906年冬，当时还没出家当和尚个弘一法师李息霜，搭仔一道辣辣日本东京留学个欧阳予倩、陆镜若等人，组建辣一个文艺社团——“春柳社”，拿欧美名作《茶花女》搭仔《汤姆叔叔的木屋》（《黑奴吁天录》）搬上舞台，引起轰动。后来伊拉又先后回国，辣上海组建“新剧同志会”，编演仔勿少文明新戏，产生了比较大个社会影响。

1928年，留美归国个戏剧家洪深，搭田汉、欧阳予倩等人辣辣上海，一道拿从文明新戏发展而来个戏剧演出形式，定名为“话剧”，并且从学术浪向确立文明新戏是中国现代话剧个源头。滑稽名伶杨华生搭仔笑嘻嘻也认为：独脚戏搭仔滑稽戏个形成与发展，受到过文明新戏个勿少影响。

1958年，上海通俗话剧团个台柱伍赛文，编了一出反映新旧社会两重天个新戏《三个母亲》；在全国戏剧会演中获得好评；通俗话剧也被推崇为中国早期话剧留存世间个“活化石”。到了1959年，上海电影制片厂导演徐苏灵又拿迭出戏搬上银幕，由文明新戏硕果仅存个几位老戏骨伍赛文、钱爱丽、王美玉联合主演。从此，上海通俗话剧团正式定名为方言话剧团，并成为“上海人艺”大家庭个成员。

1962年，“上海人艺”方言话剧团正式亮相，辣辣长江剧场演出经典剧目《啼笑因缘》。舞台浪演员使出浑身解数，集中展示了几代文明新戏演员积累个精湛演技：京韵大鼓唱得惟妙惟肖，很有骆玉笙个韵味；拳术棍棒舞得风驰电掣，虎虎生威……观众大呼过瘾，竟连演连满三个月，一票难求，十分叫座。