有腔调个蹄髈汤

◆ 沈一珠

天气预报讲，今朝要落雨，果然，下半天二点半勿到，天就阴下来了，又是打雷又是豁现（闪电），准备工作排场势老大。

秋分已经过去了，白天还是蛮热。当然也有人讲：再热也是强弩之末。是个呀，老祖宗传下来个节气也不是瞎讲讲个，早夜还是觉得着一点点风凉；更何况还有秋风秋雨推一把——就搿歇，准备仔将近廿分钟，终于开始落了，尽管雷声大，雨点小，端个是秋雨绵绵个功架……

所谓寻秋天个味道，除脱好滋好味，还是要适当应对大热天个余热和应季而来个秋燥。好在现在买小菜侪是按图索骥，花枝招展个App，为了吸引下单个手指头，看得出后台工作人员做了勿少功课；阿拉买小菜也像接受终身教育，小菜季节性、功效以及吃法等等，学海无涯小菜做舟；所以，一边看电视，一边通过App学习，当令个小菜荤荤素素搭好，一歇歇工夫就送来了：洪泽湖鲜藕、云南金银甜珍珠米、铁棍山药以及黑毛猪蹄髈半只，样样物事可以追溯到食材个源头，现在各只买菜App“卷”是“卷”得勿得了，呒没办法，也是因为现在人个嘴巴实在刁得一天世界。

蹄髈汤，加了山药、珍珠米、藕、鸡头米……

准备材料：蹄髈汏清爽焯水，斩成块备用；甜珍珠米一根斩成小段备用，可以增加汤个清香甜口；铁棍山药是自古以来价廉物美个补虚食物，烧饭、烧粥或者烧汤侪老好，就是山药皮含皂角素以及黏液中个植物碱，交关人碰着伊会引起过敏而痒得走投无路，所以处理辰光一定要戴好手套；三两根，刨皮斩成小段备用；秋天里个藕也是好末事，清热生津，健脾开胃，取一段刨皮，斩小块；苏州鸡头米上市辰光备点辣冰箱里，烧汤或者烧甜品摆一小包，有调节血糖、保护肾脏个功效；不过一定要事先拿伊笃酥，否则硬结结，吃下去勿乐胃。

烧汤算是比较便当个烹饪方式，镬子里摆清水烧开，准备好个蹄髈、珍珠米、藕、山药以及鸡头米一道放进去，先大火烧开，再转小火炖1个钟头左右，加适量盐合好味道就可以吃了。