《菜肉馄饨》趁热吃

微信扫码看视频 听钱程沪语朗读

◆赵 芸

立冬搿日飘点小雨，天色有点阴，倒是呒没真个冷下来，反倒像煞“十月小阳春”。微风里夹着一阵阵甜津津个桂花香。梧桐树浪个黄叶子，一片一片慢悠悠个落下来，搿能个日脚哪能像入冬啦？分明是秋天辣海“磨洋工”，赖辣辣上海勿肯走呀。

就辣迭个暖洋洋个日脚里，沪语电影《菜肉馄饨》首映式辣上海影城闹猛开场了。阿拉坐辣辣电影院里，像煞真个尝了一碗热腾腾个“菜肉馄饨”，从头暖到脚。

一碗普通个家常菜肉馄饨，牵动了交关观众个心肠。老汪搭爱人素娟，还有儿子一道裹馄饨个场景，温馨得勿得了。就算后来素娟走了，阴阳两隔，搿碗馄饨还是伊拉生活里个鲜活印记。老汪每个礼拜侪要搭儿子裹馄饨，搿是爷儿子两家头个“周末之约”，也是对素娟最深个念想。后来老汪吃到儿子为伊裹个馄饨，鼻头一酸——伊晓得了，素娟个手艺传拨了儿子，两代人个隔阂也就此化解。

老汪后来辣辣相亲角认得了为囡囡寻找对象个美琴，伊拉一道到国际饭店吃咖啡、去特色餐厅吃饭，但哪能及得上老汪特意请美琴来屋里吃馄饨搿份温暖？买菜、切菜、斩肉饼子、烧水、吊汤、下馄饨，一碗实实在在个热馄饨，呒没外头社交场合个客套，让两个孤独老人个心慢慢叫靠拢。搭馄饨有关个一次次欢聚，让相亲角搿帮老人从只对小辈关心个生活里慢慢解脱出来，面对同样个生活状态搭仔情感需求，伊拉互相慰藉，一碗馄饨就拿孤单老人个夕阳情愫牵到了一道。

一碗馄饨要灵光，馅子顶顶要紧。搿部电影个“馅子”，就是搿群活生生个上海人个故事。周野芒演个老汪闲话勿多，是“热水瓶性格”——外头冷、里向热，关心侪辣辣行动里，儿子一转来就快点去下馄饨；潘虹演个素娟，生前逝后侪想着老公儿子，伊个温柔搭坚韧，就是上海女人个样子。“谢谢侬，拨了我一个完整个人生”“勿要委屈自家，千万勿要委屈自家”，两句叮嘱让观众眼泪水溚溚渧。王琳演个阿芳搭陈国庆演个搿对“欢喜冤家”，辣辣相亲角“投五投六”，活脱脱就是弄堂里个时髦爷叔阿姨，浑身市井气，真实得可爱。沪剧演员茅善玉演个美琴，是带有文艺气息个知识女性，自身气质搭角色完美契合，拿沪语个软糯融合进去，既演出了生活里个真实感，也让角色间个情感互动有了浪漫火花，拿温情搭鲜活传递得恰到好处。

馄饨要鲜，汤底是灵魂。搿部电影个“汤底”，就是阿拉上海鲜活个城市风貌。银幕浪人民公园相亲角、南昌路个石库门、复兴公园大草坪、复中市集个菜场，侪是阿拉熟悉得勿能再熟悉个生活场景。片子里个一句“此地旋转木马老早拆脱了”，勾起多少上海人小辰光个美好回忆！当年个上海小囡大多数侪骑过复兴公园里个旋转木马，一圈一圈转，老开心个。

今年是中国电影诞生120周年，《菜肉馄饨》就像一份诚意满满个“上海伴手礼”，献拨了观众。从老底子《三毛学生意》《股疯》到今朝个《菜肉馄饨》，沪语电影从来呒没“断过香火”。

“一直想拍一部献拨了自家家乡、献拨了生长个搿座城市、献拨了自家父辈个电影”“因为我是上海人，老想拍上海电影”，搿是导演吴天戈搭制片人顾晓东个心声。搿眼电影人勿是拍部方言片“轧轧闹猛”，伊拉是辣辣“抢救文化遗产”“延续城市记忆”，用镜头讲拨了全世界听：上海闲话勿是“老古董”，伊是有温度、能呼吸、会传承个语言，是阿拉个根。

走出电影院，天色已经暗了，“万家灯火”也已经亮起来了。空气里仍旧飘着浓浓个桂花香，肚皮倒也勿觉着饿，因为搿碗热腾腾个《菜肉馄饨》实实足足暖了胃。

如果侬也想到电影院里吃一碗《菜肉馄饨》，味道一定勿错。

要趁热吃啊！