三代人吃梨膏糖

◆ 李松根

秋梨成熟，又到了吃梨膏糖个好辰光！讲起上海老城隍庙梨膏糖，相信老上海侪勿会陌生。我屋里祖孙三代，侪跟上海梨膏糖有段难忘个过往。

小辰光个记忆里，爷叔（祖父）被慢性阻塞性肺气肿缠了大半辈子。解放前个上海郊区农村，缺医少药是常态。印象里，爷叔长年躺辣门后头个床浪向，张大嘴巴吃力喘气，像条离开水个鱼，喉咙里个痰鸣声像拉风箱，肩胛上下抽动，只有咳出一口白痰，方能稍稍松口气。埃歇辰光农村老人生病，常被家人避讳，只有我迭个6岁个孙子，能经常陪辣伊身边。有一天，村口传来“卖梨膏糖”个吆喝声，有村民讲搿种糖能治气喘病，我马上奔回屋里，翻出破锄头、铜面盆，呒没跟屋里其他人商量，就去换了四块梨膏糖送到爷叔面前。爷叔伸出枯瘦个手摸摸我个头，眼眶里流出眼泪水，断断续续讲“好孙子”。但搿份温暖呒没能够让伊留下来，刚过五十岁，爷叔就离开了。

1973年下半年，我从铁道兵部队转业回上海，两年后姆妈突然得了脑溢血，离开了阿拉，阿爸急火攻心，也得了慢阻肺。搿辰光我住辣南翔镇浪，阿爸住辣乡下阿叔屋里。为了帮阿爸治病，我到处奔波，听说杭州有名医，就专程去请；辣厂里做办公室主任个辰光，每次去市区办事，总归要到城隍庙买梨膏糖，再到雷允上大药房配强的松、氨茶碱。但再多个努力，也呒没办法阻拦病情个脚步，69岁个阿爸最终带着遗憾离开了我。

三年前，我也被确诊为慢阻肺，血氧饱和度只有90左右。万幸个是，现在个医疗条件比过去好得多了。我一面用西药畅通气道，一面寻中医师调理。三年下来，病情慢慢稳定了。老伴跟囡囡更加贴心，帮我买了制氧机，还总记得买梨膏糖帮我润肺。耄耋之年个我，虽然仍旧受病痛困扰，但比爷叔、阿爸多了交关安稳跟幸福。

世界浪个糖果各有滋味，北京个丝光糖、山东个高粱饴糖、苏州个麻酥糖，各有各个风情。而有160多年历史个上海梨膏糖，老早超出了“糖”个范畴。伊以生梨汁为底，掺进冰糖、川贝、枇杷叶等15味药材，经繁复工艺熬制而成，现在已经是国家级非物质文化遗产了。

上海梨膏糖，阿拉屋里祖孙三代侪吃过。伊虽然勿是治疗慢阻肺个神药，却见证了岁月个变迁——从爷叔辰光个无奈，到阿爸搿代人个艰难，再到现在我个安稳。一口梨膏糖个甜里，藏着三代人个岁月，也让我更加懂得珍惜眼前个幸福生活。