鲜嫩清甜姜柄瓜

◆沈一珠

马上就要入冬了，用一只姜柄瓜为秋天味道收个尾；也是因为近段辰光蛮欢喜姜柄瓜，云南特有个南瓜品种，3斤一箱，有六七只，20元出头一点，勿算贵。

查了查，为啥叫伊姜柄瓜，一种讲法，瓜柄有点生姜味道；凑近瓜柄闻闻，还真有一点点；再闻，又寻勿着了；所以，更加认可第二种讲法，伊长得像只掐瘪脱个灯笼辣椒，还有点皱巴巴，又加上长熟仔也就一只巴掌大小，所以当地人就叫伊僵瘪瓜，意思是长勿大个瓜；“姜柄”应该是谐音。

从前总以为南瓜侪是黄澄澄个，时尚界也专门有种颜色叫南瓜色；但实际浪，南瓜还有白、紫、绿等颜色，姜柄瓜就是绿个；也覅以为南瓜侪是扁圆个，其实也有长长短短，有磨盘南瓜、牛腿南瓜、蛇南瓜……最近还有一种花生南瓜，长得像放大个长生果，斩块，跟红枣一道蒸蒸，老好吃。

眼门前个姜柄瓜，小归小，据说营养斜气丰富；顶顶要紧个，作为家常小菜，伊操作起来斜气便当，味道也是斜气灵光。

假使拿伊当早饭，汏清爽后，顺着瓜棱切开，改刀成小粒，开水里焯三、四分钟，冷开水激一激，沥干后，加入当令个蟹黄酱适量，再依自家欢喜口味加糖、醋、生抽、生姜末及葱花，拌匀就好。

假使拿伊当小菜，汏清爽切小粒备用；再备几颗新鲜香菇切小备用；开油镬，先入香菇，再入南瓜粒，加适量糖、盐、瑶柱鲍鱼汁调味料一起翻炒均匀，盖上镬盖；想吃水嫩点个，烧两三分钟就好；喜欢更加软糯个，焖三四分钟就可以了。

新鲜香菇肥嫩幼滑，有轻轻个木质香气；姜柄瓜水嫩软糯，有淡淡个南瓜甜味；两者融合，汁水丰富，入口清润；至于香菇个美拉德色搭配姜柄瓜个灰绿色，放到时尚界，也是永不过时个调调。