从排队买早点想到

文/董阳光

平常最讨厌“插队”个人，一趟买早点“运道好”，一记头连牢碰着两个。

一早，到点心店买早点，排队个人勿多，只有三四个。啥人晓得，轮到我个辰光，排辣我后头一个瘦男人，一边拿钞票个手伸到店主前面，一边叫：“两团粢饭！老样子！”我回头看了伊一眼，几乎是同时，前面又杀出一个胖女人，开口就喊：“两根油条！两杯豆浆！”我一记呆脱。看到过插队嗰，迭能前后交叉“配合”嗰，还是头一趟碰着！有句闲话讲：会哭个小囡有奶吃。果然，店主先拨迭两个“小囡”买了。当时，我真想搭迭一胖一瘦两个朋友理论一下，勿过最后还是选择“放一马”个沉默。原因也简单：伊拉堂而皇之插队个“素质”迭能结棍，葛末，伊拉吵相骂个“水平”一定勿会推板。我一对二，跟伊拉讲道理勿会有啥好结果。我勿想还呒没吃到点心，就先吃“一包气”，更勿想还呒没吃到“粢饭糕”，就吵得“血压高”。

生活里，插队现象到处侪有，辣车站、地铁等车子；辣医院、商场付费；辣高架川流不息个车流里，勿打方向灯，随意变道个“插队”，也经常可以看到。插队辣人群里，难免会引起争吵；辣车流里，更容易引发交通事故。

勿过，总个来讲，虽然插队到处可见，但自觉排队个人更多。辣地铁站里，经常可以看到交关年轻人自觉排队上车，哪怕只有二三个人，也是排得整整齐齐。至于勿排队，急匆匆抢先上车个人只是极少数。走进车厢，看到阿拉老年人让座嗰，也同样勿少。“物以类聚，人以群分”，真希望阿拉社会里向，自觉自律个人群越来越大，而自私自利个人群越来越少。