养成“公筷公勺”好习惯

文/许德华

新冠疫情让阿拉重新审视平常搿眼生活习惯是勿是卫生，最让人有感觉个就是推广公筷公勺。啥叫“公筷公勺”？譬如一大盆子菜十几个人吃。为了防止交叉感染，辣旁边放几双公筷；吃菜个辰光，用公筷搛菜到自家个碗盏里，然后拿公筷放回原位。自家碗盏里个菜用自家私筷。公勺也是同样道理：先用公勺拿汤舀到自家汤碗里，放回原处，再用自家勺子喝汤。使用公筷公勺看上去有点“烦”，但的确是一种能避免交叉感染个好习惯。

17年前“非典”辰光就曾经倡导“公筷公勺”，可惜呒没坚持下来，其实好习惯是养得成嗰。

像我60后年纪个朋友或许还记得老早四川路搿种闹猛个商业街，上街沿浪侪有两只标配：废物箱、痰盂盥。痰盂盥有盖头盛半盆水，专门供行人吐痰。搿歇想来老恶心个事体辣埃歇辰光已经是一种老大个进步了，因为当时有勿少人是习惯随地吐痰嗰。我经常看到清洁工辛辛苦苦收作痰盂盥，心里就想大家再进一步覅吐痰勿就呒没搿种事体了？后来阿拉老百姓生活条件勿断改善，生活环境也越来越干净，到处吐痰个人也越来越少，马路边浪个痰盂盥也已经消失交关年数了。

我小辰光屋里人口多，经济条件也勿算好，所以为了吃得“公平”，吃饭上菜总是由外婆平均分配，拨到各人面前个盘子里。我印象里最好白相个是吃早饭，油条切碎蘸酱油，每个小人面前侪有一只漂亮个酱油碟子，邻居看到侪觉得蛮好白相。

分餐，客观浪也保护了大家个身体健康，虽然当时呒没意识到搿一点。后来，我有一个阿姐本来身体蛮好，婚后不久得了胃病，医院里经过检查，讲是“幽门螺杆菌”感染。原来伊拉婆家平时吃饭忒“团结”，盆子里菜“筷来筷去”，屋里有人得了肠胃病，结果就是大家侪被传染了。迭个教训让我记忆深刻，后来勿管是出差旅游，还是辣屋里向，侪尽量分餐制。病毒勿认人，特别是呼吸道、肠胃系统搿类毛病，极容易“口口相传”，假使大家侪有了“公筷公勺”个共识，讲究清洁卫生，习惯成自然，病毒就碰勿到阿拉了！