吃素？做只乾坤布袋

文并图/沈一珠

最近一个朋友发愁，突然有一天，只有六七岁个小女儿跟伊讲，人实在太残酷了，活生生个猪牛羊侪被吃脱了，从今朝开始我要做一个素食主义者。

小人个想法总有出处，一定要尊重。问题是，小人正好辣长发头浪，身体健康离勿开蛋白质，哪能办呢？

凭良心讲，现在小人也蛮难教嗰，又要教伊拉懂规矩，走出去立呒没立相，坐呒没坐相总归勿来三；又要让伊拉上得厅堂下得厨房，琴棋书画顶好样样侪会，蛋糕曲奇顶好也要拿得出手。所以，张弛之间，迭根橡皮筋松松紧紧哪能控制，对大人来讲，是新课题。

朋友当中也有一周设一个吃素日嗰，就跟伊出主意：侬可以试试看，让小朋友一个礼拜吃一天素。

当然，吃素勿仅仅是炒盆山芋藤、拌只马兰头介简单。所以，就想起迭只乾坤布袋了。顾名思义，迭只菜除脱做成布袋样子，里向还装仔五颜六色交关好吃物事，又包含了交关美好祝福，富有、长寿、康宁……所以，也叫伊五福布袋。辣眼门迭种非常时期，祝福也是日日需要嗰。

迭只菜吃工夫个主要是准备工作，其中还有一样要紧物事，叫干瓢，也称葫芦条；伊原产日本，据说是一种纤维素含量高，能加速胆固醇降解、减少心血管发病个健康食品。买来个干瓢通常是干货，吃前头要先泡软，再加高汤煮透。勿过，辣此地搿道菜里伊只是配角，用伊来拿“布袋”口扎紧。看上去有点大材小用个意思，勿过，人生呒没配角，美食制作也是一样嗰。

乾坤布袋个配料比较多：湿豆腐皮2片，花菜、素火腿、鲜香菇、胡萝卜、珍珠米、毛豆子及干瓢各少许。用到个调料包括：酱油、糖、胡椒粉和盐各若干。

做法步骤：

1.湿豆腐皮用酱油、糖腌一腌，干瓢泡软备用；

2.花菜、素火腿、鲜香菇、胡萝卜切丁，和珍珠米、毛豆子一道，加稍许胡椒粉、盐炒一炒，盛入碗备用；

3.豆腐皮摊平，炒好料摆上去，像布袋一样包起来，用干瓢拿口扎起来；

4.做好个布袋摆辣盆子里，进蒸笼蒸10分钟就可以上台子吃了。