去鱼头王店吃酱汁肉

文并图/沈一珠

写迭篇个辰光，正好从网浪看到一家之前吃过个饭店出了一篇推文：一块有情怀个酱汁肉。

文章一开头就讲，苏州人勿时勿食，即使日日有、天天吃个肉，也是有时令变化嗰：春天酱汁肉，热天粉蒸肉，秋天扣肉，到了大冷天就是酱方了。至少辣伊拉个饭店里，搿几块肉出现个辰光是勿会弄错嗰。

其实，我搿趟要讲个是另外一家鱼头王饭店。

第一趟去，本来是想请几个朋友一道去吃七宝鱼头王，结果有人坚持要到迭家鱼头王店，因为吃过，觉得味道好。结果就去了，哦哟，生意好得来，两层楼饭店，吃客潽进潽出。第二趟，是另外一个朋友约嗰，发来地址一看，又是迭个地方。迭位朋友住辣淮海中路，专门来上海西部比较落乡个迭家饭店，也是听了朋友个朋友介绍。看上去，已经有点“酒香不怕巷子深”个意思了。

至于到底哪一家饭店更加好，倒是勿好乱评论，只能讲到迭家店吃鱼，仪式感老足：一条廿几斤重个鱼拎出来看看，吃客同意了，再一鱼四吃：先是剁椒大鱼头，再是一盆雪雪白个鱼头汤，一大盆熏鱼，之后，再来一碟浓油赤酱个红烧划水。配套点心是一大碗韭菜小阔面，拌了剁椒鱼头个汤水，邪气入味。

其实，七八个人，点一条鱼就够了。只勿过，一条鱼从处理到四样花式烧好端上来，需要一段辰光，所以，阿拉还是点了几只菜热热身，喏，就碰着迭碗煊煊红、糯笃笃个酱汁肉了，是春天里个胭脂红，跟之前个“有情怀个酱汁肉”也算有个呼应。

关于酱汁肉个烧法，前两年去吃饭辰光，老板倒是原原本本讲过一遍。只勿过，大家侪懂个，就算仔仔细细讲拨侬听，侬也不见得烧得出伊个味道。所以，屋里烧菜，味道能有七八分像也就可以了。想想，一家饭店生意好，总是有道理嗰。

酱汁肉个食材：五花肉1斤、红曲粉、黄酒、桂皮、八角、葱、姜、盐、酱油、冰糖。

做法：先拿五花肉整块汏清爽，摆进锅里焯水，之后捞出来，汏清爽沥干，切成1寸左右个方块备用。肉块入锅，加黄酒、桂皮、八角、葱、姜、酱油以及红曲粉调制个汁，拿肉浸没，大火烧开，滚一歇歇，加冰糖，转小火焖到酥烂。出锅前开大火收汁，拿葱姜等配料搛出来，就可以盛出来吃了。