小辰光天热侪着木拖鞋

文/钱红春

天气又要热起来了，像我搿能“奔八”年纪个老人，多数侪着过木拖鞋。

上海解放个辰光我刚刚读书，一到天热，放学或者是放暑假，脚浪侪会拖双木拖鞋。埃辰光上海呒没几条柏油马路，交关街道，尤其是弄堂小路，侪是用比拳头大一眼个石头铺个弹硌路，着木拖鞋走辣搿种路浪向就有“呱嗒呱嗒”个响声。一到夜快头，弄堂里来了卖糖粥，卖咸鸭蛋，炸臭豆腐或者是一路叫喊用牙膏壳、药水瓶就能换一块糯米糖个小贩，大人小人就会着仔木拖鞋拱过来。搿个辰光，一歇高一歇低，一歇快一歇慢，一歇脆一歇闷个“呱嗒呱嗒”声音就响彻整条弄堂，闹猛得勿得了。

木拖鞋是用寸把厚个木板，按脚个大小锯成鞋底形状，辣前半部分最宽个地方钉一条寸把宽个带子就可以了。木板必须是结构紧密个硬杂木，耐磨，而且勿会开裂。木拖板个带子也有讲究，大多是用废弃轮胎个内衬。一般个木拖鞋勿分男女，只要尺寸合脚就可以，土产杂品店或者是菜场边浪个地摊侪能够买到。为满足女性爱美个天性，商店里也有选料讲究、做工精细、色彩缤纷个女式木拖鞋，但价钿要比素板木拖鞋大交关。

木拖鞋除脱加工便当、价钿便宜、着起来方便，还能够晴雨两用。热天雨水多，雷阵雨讲来就来，半路浪要是碰着落雨，鞋子就会遭殃，着木拖鞋就呒没搿点烦恼了，就算有点泥浆污垢，水冲一下就清爽。每趟暴雨以后，阿拉弄堂口个马路浪就会积水，有辰光会漫到人行道浪。搿个辰光，我就会同小伙伴们着仔木拖鞋辣水里奔来奔去，打打闹闹。尤其是马路浪慢慢交开过积水个汽车，车子后头会拖出扇面形状水波浪。搿辰光，阿拉就会迎去用手捧，用脚挡，弄出点水花来，白相得比过年放炮仗还开心。马路积水要是深一眼，橡皮套鞋根本派勿着用场，假使赤脚，弄勿好脚会拨沉辣水底下个垃圾戳痛，甚至受伤，搿辰光着木拖鞋是最恰当勿过了。埃辰光阿拉住辣苏州河宝成桥附近，有辰光涨潮，水会漫到岸浪，辣桥与路之间形成一二丈宽个水塘，有点人就会“趁水打劫”，着仔木拖鞋做起临时摆渡生意，来来回回背要上下桥，又勿想脱鞋子赤脚个人，赚点外快钞票。

着木拖鞋走路，步子跨勿大，也走勿快，要是走辣光溜溜个石头路上，一个勿当心就会滑倒或别痛。木拖鞋浪个带子同木板容易脱开，搿辰光要么用脚指头夹牢带子像跷脚一样继续走，要么就脱下来拎辣手浪赤脚走，邪气尴尬。所以木拖鞋一般只好辣屋里或者是附近着着。再讲进电影院、图书馆或者是乘公共汽车等，是禁止穿木拖鞋嗰。我参军后辣新兵连集训个辰光，有位战友曾经带仔一双木拖鞋，但只辣集训个当天夜里看伊着过一趟，后来再也呒没看伊着过，看样子是被禁止了，因为勿符合战备要求。

后来随着塑料拖鞋渐渐流行，木拖鞋也退出了阿拉个生活。

自我参军离开上海，再也呒没着过木拖鞋，到现在已经快七十年了。但对木拖鞋印象还是交关清晰亲切，“呱嗒呱嗒”个声音常常会辣耳朵边浪响，像木琴一样交关好听。