热天赶农时 锄草种豆忙

文/周曙明

夏至是农历廿四个节气里的一个。夏至一过，就进了农事里个“头时”，俗称“夏至起头时”。沪谚有“头时七，二时五，三时三”个讲法，搿个十五天称为“时里”。辣辣“时里”，农民抓紧辰光做好田间管理，盼望秋天能有好收成。

具体讲就是“头时花，二时豆，三时种赤豆”。气象意义浪进入“时里”个“黄梅天”，叫“时梅”。清末张春华编个《沪城岁事衢歌》里面就讲：“庭阶布润绿苔滋，一半晴阴带雨丝。溽气熏人当昼午，不堪排遣热三时”。这是描述“时梅”里个气候特点。诗后有注：“黄梅之后为时梅，俗谓夏至起头时。又曰‘冷黄梅，热三时’。每岁至此多郁热。”

小辰光听姆妈讲，迭个叫“时里个日头，蛮娘个拳头”，意思就是搿歇辰光个太阳特别酷热。“时梅”天气闷热潮湿，棉花田里个杂草就会疯长，同棉花幼苗争光、争肥、争空间，严重影响棉花收成。告老，辣“起头时”个七天里，通常会集中劳力到棉花田里向锄草。1922年出版个《沪谚》里，还有一句闲话叫“时里的锄头，好是膏头（肥料）”。意思就是辣搿段辰光多用锄头锄草，对种棉花来讲，赛过多施一趟肥，可以让棉花长得好。

“头时”一过，就是“二时”。二时里种豆最好，由于地温高，水分充沛，豆种播种到地里，很快就会萌发生长，绝对勿会“做酱”——烂脱。

到了“三时”里向，是种赤豆个好辰光，种一窝成功一窝，假使过了搿段辰光再种，出苗率会大受影响，收成肯定勿好。

所以，每年夏至前后，大家侪抓紧时机到棉花田里去锄草。然后，又忙着种黄豆、青豆、黑豆、赤豆、绿豆，还有牛踏扁豆。