一汤一茶罗汉果

文并图/沈一珠

辰光过得真快，好像也就隔仔一霎眼个工夫，大暑节气就到了。现在个高温天越来越热，所以要倍加珍惜眼门前每一段平和温暖个日脚。

夏日炎炎个日脚，就像古人在《释名》里说个这个“暑”字：暑，煮也，热如煮物也。其实，搿几天已经身在“煮”中，老清老早，野乌子乱叫。

当然，有各式各样清凉消暑个办法。

像我一个好朋友，三四天前就一脚油门，一路向北，朝海边潇洒而去。搿两天，伊赛过实行了温度自由，孵勒24摄氏度左右个天地之间，仰望星空，乘乘风凉。

或者，阿拉几个欢喜画画个好朋友，孵勒空调房里，各执画笔，画个侪是清凉绿夏。去勿了远方，够勿着海风，也可以安下心来，像宋人温革《琐碎集》中讲个：“避暑有妙法，不在泉石间。宁心无一事，便是清凉山。”

老好，人人心里侪有一座清凉山。只勿过，清凉山里也要有食物，比方罗汉果。隔日夜里，从中药房买了罗汉果、夏枯草、蜜炙枇杷叶等，趁早上天气还清凉，烧一壶罗汉果茶，等歇出门随身带着；一个炖汤，晚上回家，添两碟小菜，一碗白饭。

一茶，取罗汉果1个打碎，与15克夏枯草一道煎三次，滗出汤汁，欢喜甜味道个可以加点红糖，欢喜原味个就勿加，按自家口味来。南方湿热，老百姓夏季侪用搿种茶水解暑，常喝此茶，有清肺、润肠、化痰等作用。

一汤，取猪腱子肉半斤左右，焯水备用；罗汉果取四分之一个，蜜炙枇杷叶20克，生姜若干，一道汏清爽装一只茶包。所有食材一道放清水里，大火烧开，小火炖40分钟左右，加盐调味就好。

罗汉果，人称良药佳果，蜜炙枇杷叶，去苦味，两样都性凉，味甘，又勿会升高血糖。好吧，且把这一汤一茶，当作今朝阿拉个清凉山。