书架上个地理课本

文/邵天骏

书架上有一本我珍藏了交关年个中学《地理》课本，虽略显陈旧，却能勿时打开我个记忆闸门，拨我带来一段美好个回忆。我之所以收藏搿本勿起眼个课本，是因为一位当年个中学地理老师，伊上地理课辰光自然流露出来个幽默感让阿拉搿点学生仔百听勿厌。

我读个中学背靠黄浦江，来来往往大轮船勿时映入眼帘。我勿经意间就对地理产生了浓厚兴趣。而地理老师个幽默风趣，辣阿拉学堂里也是出了名个。讲课辰光，伊总有各种精彩妙语脱口而出。比如讲到陆地搭仔海洋个关系，老师形象地将其比喻为“七分海洋三分地，陆地是个小弟弟”，顿时拿陆地面积搭仔海洋面积个比例划分讲得清清爽爽。

讲到太阳系，哪能让学生记牢九大行星个位置顺序？地理老师拿知识点总结成一句闲话：“水晶地里花木吐艳，天海也变得明亮了”，利用谐音说明了九大行星依次是水星、金星、地球、火星、木星、土星、天王星、海王星、冥王星。即使到了几十年后，我依然记得非常清晰。

还有一些国家和其所处个地理位置，包括比较长个首都名字，同学们难以记牢，地理老师也会充分运用谐音法、典故法、联想法等各种记忆方法，勿断拨阿拉加深理解搭仔印象。伊略显夸张个肢体动作，令人捧腹个“一本正经”语言，使阿拉个学习兴趣完全激发出来，整堂课直到结束仍意犹未尽。每当打开散发着油墨清香个地理课本，从中了解世界各地个风土人情、名胜古迹，浏览高山、草原、森林、瀑布、湖泊、火山、冰原风光等插图，我侪有一种邪气愉悦个感觉，希望下一堂地理课能够快些到来。

参加工作以后，无论出差到啥地方，我侪会去书店买一些当地个地理书搭仔地图册，作为收藏品。现在屋里向已经有勿少搿方面个书册。各种各样个地理书搭仔地图册尽管装帧、用纸、印刷比以前更加考究，我仍旧钟情于保存搿本中学课本。正是有了那位风趣幽默个老师，学习勿再枯燥，使我获益匪浅。

现在已经放暑假了，中考、高考也已经结束，许多小朋友可以轻轻松松地白相了，而老师们还要利用假期准备下学期个教案。搿搭，我要向各位老师深表敬意，感谢伊拉个奉献。