又见“菜篮子”专用车

文/钱红春

前几日去拜望老同事，看到一部有“菜篮子”三字个厢式货车停辣小区广场边浪。老同事讲，搿是市郊某果蔬合作社定期来摆摊头卖菜个专用车。

到小菜场买菜是大家天天要做个家务。四十几年前，政府为了解决城市居民买菜难，搞了“菜篮子”工程，当时搿种货车辣马路浪常常看到。现在买菜勿难了，搿种车子已经看勿大到了。

篮子，上海闲话叫“篮头”，菜篮子就叫“菜篮头”。

菜篮头有交关种，比较多个是篮口直径半尺多，深一尺多。篮头拎襻两头分叉结扎辣篮口边浪，拎辣手里或者是套辣手臂膊浪邪气稳当。

当时篮头到处有卖，除脱国营土产杂品店搭仔竹木制品店，马路边、弄堂里也经常可以看到摆地摊卖竹篮个小贩，还有用扁担挑仔几十只篮头走街串巷卖个。

买小菜看看简单，其实也蛮吃力个。当天要买点啥小菜，买多少，出门前侪要想好，除脱带好钞票，还要带好相应票证。假使忘记脱或者拿错脱，乃末一趟趟有得跑了。当年大家平常侪吃得简单，到了礼拜天或者节假日，侪想改善改善，小菜场就会闹猛得勿得了。勿管是肉摊头、鱼摊头，还是蔬菜豆制品摊头，每只摊位前头侪排满人。

交关人家侪是天勿亮就一家门一道到小菜场排队。人一多，纠纷就难免多起来，当时小菜场里顶顶忙个勿是营业员；勿是卖葱姜蒜个老阿奶；也勿是帮人刮鱼鳞、收点鱼肚肠卖到乡下头当鸭饲料个阿姨，而是戴仔红袖章，手拿喇叭筒维持秩序个纠察。有人讲当时买小菜比上班还紧张，真是一眼勿瞎讲。

后来国家经济建设蒸蒸日上，物资供应充足了，市场繁荣了，各种票证也取消了，特别是改革开放以后，阿拉国家个化工业飞速发展，各种塑料制品越来越多，越来越好，阿拉居民每天买小菜必备个篮头，逐渐被各种规格、颜色个塑料袋取代，就算空手到小菜场也能够满载而归。屋里拎仔几十年个竹篮头侪“退休”了。

现在买菜更加便当，假使勿想跑菜场，手机浪向点点按按，快递一歇歇就会拿要买个小菜送上门，比自家到菜场买菜还要快。至于习惯“眼见为实”，买小菜辰光欢喜挑挑拣拣个“买汏烧”们也用勿着担心，侬看，标有“菜篮子”三字个专用车，会定期拿菜场搬到家门口。

交关年数勿拎菜篮头了，但“菜篮子”三个字还是深深印辣我个记忆里，除脱当年印象深刻个“菜篮子”工程，还有曾经个酸甜苦辣。