讲讲“遗失”

文/冯济民

辣末生头想起迭个题目，就写几句。遗失，就是落脱物事。

落脱个物事可大可小。大个像汽车、电动车，小个像钢笔、手表。落脱个物事有个珍贵有个普通。珍贵个有特别个纪念性，普通个到处可以看见。所有个落脱当中最吓人个是落脱小囡。

落脱物事个原因五花八门。有个是自家呒没保管好，有个是受到别人个欺骗，有个是做事体个辰光粗心大意，有个是莫名其妙一时疏忽。有个是真个落辣外面，永远寻勿回来了；有个放辣啥地方忘记脱了，过段辰光又寻着了。

落脱物事以后个感觉搭仔反应各式各样。有个捶胸顿足、痛哭失声；有个懊丧勿已、悔恨终生；有个闷闷勿乐、积郁成疾；有个丝毫勿放辣心浪，仍旧开开心心。

落脱物事后个遭遇各有勿同。有个能够失而复得，有个再也寻勿回来。面对别人落脱个物事，拾金勿昧者蛮多，贪为己有者也勿少，报刊杂志，电影小说里屡见勿鲜。前者甚至能救人一命，令人敬重；后者损人利己，遭人唾弃。

人一生当中多多少少侪落脱过物事。勒我75年个人生中就落脱过勿少次。印象比较深刻个是1961年暑假，当时我13岁，第一次单独坐火车从苏州回上海。回到屋里发现身浪背个小书包呒没了。里向有课本、玩具、饼干，当时我又急又怕，难过了老长辰光。还有一趟乘18路电车，忽然发现皮夹子呒没了。售票员马上让司机拿车子开到派出所，我勒派出所做了笔录。后来，皮夹子呒没寻到，皮夹子里个工作证倒是拨小偷寄到工作单位了。我还落脱过折叠伞、钢笔、折扇、购物卡、身份证、钥匙等勿少物事。最贵个是花几千元买个新手机。

年纪大了忘性大，经常脱头落攀，常常会落脱物事。我现在也想通了，落脱了就覅去多想，勿能坏了心情影响身体健康。只要人平安健康，比啥个侪重要。

得之坦然，失之淡然，顺其自然，此生悠然。比上勿足，比下有余，无忧无虑，知足常乐。谨以此搭亲们共勉。