阿拉屋里个记账传统

文/王志良

记得小辰光，阿拉屋里六个人侪靠阿爸每个号头40块洋钿个工资过日脚，为了尽量节省开支，姆妈一门心思精打细算，每天夜里吃过夜饭，总要拿出一本小簿子，让二阿哥帮忙记账，拿当天个吃用开销搭仔人情往来全部记录到簿子浪，一笔勿落。埃歇辰光，我勿懂事体，看到姆妈记账就问伊：“屋里向就迭点钞票，侬记得再仔细，花脱个钞票又勿会再生出来，白白浪费工夫，有啥意思？”姆妈就讲：“侬还小，等侬长大了，自然会明白嗰。”

后来响应号召，离开学堂，到农场里劳动。再后来回到上海，恋爱成家。恰逢单位体制改革，妻子工作个纺织厂压锭减员，伊停薪留职，重新到劳务市场寻工作。屋里个收入一下子减少一半，全靠我一家头个收入维持日常开销，8只油瓶7只盖，盖来盖去总归勿够，往往月底还呒没到，钞票就差勿多花光了。为了做到收支心中有数，我继承姆妈衣钵，开始记录屋里个生活开支，除脱油、盐、酱、醋、人情往来，还包括交通费、书报费之类必要开支。妻子看了以后，用勿屑口吻讲：“迭个有啥好记呀，钞票又勿会越记越多。”我对伊讲：“现在屋里只有我一家头有收入，阿拉要开源节流，拿钞票用辣刀刃浪。”

女儿到了上学个年龄，屋里向开支项目又增加了教育、校服、春游、秋游等项目。为了节约钞票，我常常吃过夜饭，带仔妻子一道去逛超市，买点促销打折个果蔬、肉类、大米、面包，每趟从超市回来，脚踏车浪总归要放勿少物事。有一趟，一个老同学看到我买仔交关物事，就笑问：“侬买介许多物事，要吃到啥辰光啊？”我笑而勿答，有点尴尬。

妻子退休以后，领到了退休工资，屋里经济条件得到改善，我用勿着再为日常生活开支犯愁，平常用钞票勿再缩手缩脚。

现在，随着互联网时代来临，我已经勿大去超市买物事了，需要买啥物事，只要拿出手机，动动手指，到网店下单，快递小哥直接送货到屋里，方便迅捷，支付方式也从现金、信用卡变成微信、支付宝。虽然我仍旧习惯性记账，但记账方式也从小簿子变成了手机，钞票用辣啥地方，手机里一查，一目了然。可惜当年写满十几本簿子个账本，辣几次搬场个辰光散失掉了。

搿眼普普通通个账本里向记录个勿仅是简单枯燥个数字，而是记录了一个家庭从困难到温饱，直至富裕个过程，是阿拉老百姓生活水平勿断提高个见证。