冬吃萝卜味道赞

文并图/沈一珠

勿晓得阿是跟属兔子有关，天生就欢喜萝卜，长萝卜圆萝卜红萝卜青萝卜，红烧白烧冷拌热炒烧鱼烧肉，侪欢喜；更覅讲现在搿歇辰光，天气一点点冷下来，萝卜质地一点点好上去：扥扥份量越来越重，摸摸表面越来越光生。前两天买仔两只带泥长萝卜，汏一汏，慢慢交切下去，刮辣松脆；看看，居然像苹果一样带溏心——冬吃萝卜，就是因为迭个呀，水分足，味道鲜。

可以煎萝卜。跟朝后起一直到明年春天2月份左右个萝卜相比，搿歇刚刚出泥个萝卜会更加爽脆，用来煎或者炒，顶顶鲜洁：捡瘦瘦长长个长萝卜，横过来，切成圆片，摆勒油里，煎到有焦香出来；欢喜软熟一点个，可加点水烧一滚，用蒸汽拿萝卜煨透；最后洒点胡椒盐上去，简简单单个鲜。

也可以拌色拉。一到菜场，看到萝卜总会情勿自禁地买几只，除脱白萝卜，还有青萝卜、红萝卜也是又好看又好吃个。选三样萝卜，各切5公分长短一截，先竖着切成薄片，再拿薄片切成细丝，分别摆冷水里浸10分钟左右，去脱点辛辣味；捞出来晾干后，三色萝卜一道拌均匀，倒进自己欢喜个色拉酱；或者自己拌酱汁，用生抽、醋、盐、糖和麻油，有个话，加点熟芝麻增加点香味道，拌均匀就好。

稍许复杂点，是萝卜糯米饭。假使讲，煎、拌萝卜是前菜，搿末，伊就是大菜。先准备两根直径四五厘米个长萝卜，再准备糯米50克、肉糜30克左右，姜末、油、盐、酱油、料酒、蜂蜜、白胡椒粉、枸杞和葱花各少许。

糯米汏清爽，浸泡2个钟头左右；枸杞泡软；肉糜里摆姜末、料酒、盐、油、白胡椒粉一道抓匀，再与浸泡好个糯米一道拌匀。做萝卜盅是关键，拿萝卜切成四五厘米长个小段。可以先用小刀勒萝卜段个中心区挖一只锥形孔洞出来，然后，慢慢深入，保护好底部，挖成一只圆柱型个茶盅，拿蜂蜜勒萝卜盅里涂一层底；再拿拌好个糯米饭塞进去，勿用塞满，给糯米留足膨胀空间，上蒸锅蒸半个钟点就好，上桌前撒葱花，摆几粒枸杞，增加色和香。

搿天，萝卜买多了，糯米也泡多了，搿道菜连做两天，虽然要讨点手脚花点辰光，勿过，一顿夜饭，有伊，再加道鱼汤或者混合蔬菜汤就足够了。特别提醒，挖出来个萝卜碎屑也勿浪费，炖成萝卜羹，加糖或加蜂蜜服用，也是冬吃萝卜大合唱里个一个音符。