申花惜败谁之过？

娄一晨

本周二晚间，申花队客场1比2惜败于成都，遭遇本赛季第一场失利。

比赛结束，娄老师还在惋惜申花队运气欠佳时，友人S（申花忠粉）就打来电话，愤怒声讨。

S：喂，老娄啊，申花队刚刚比赛侬看了吗？裁判会得吹比赛吗？莫名其妙拨对面一只点球！明明伊拉成都队从自家半场断球额辰光已经对于汉超犯规了呀！断命，介明显额犯规勿判，回过头来判申花队手球！搞啥百叶结？绝对黑哨！

我赶紧安抚他：哎哎哎，老兄啊，先覅介激动呀……申花队晏新力搿只手球，主裁判一开始呒没想吹，是因为VAR裁判觉着有问题通知主裁判，所以主裁判亲自去看了录像回放再判额点球……

S：个么侬意思就是VAR裁判搞额咯？既然VAR可以回看，为啥勿再多往前头回看一点呢？多回看一点么就看到于汉超拨人家犯规了呀？

我只好苦笑：朋友啊，VAR视频回放勿好无限制额回放下去额呀……我之前请教过几个裁判专家，根据目前国际足联额规则，进攻方在建立本次点球过程中如有犯规则需要回看。但是，迭个过程从啥地方开始呢？是从于汉超拨对方抢断额地方开始？好像迭个过程当中申花曾经抢到过球权，有过一脚解围，然后人家再重新组织进攻。所以，VAR要回看也只好从成都队再重新组织额辰光开始……

S：啊？侬确认规则是搿能写额？

我：我呒没专门去研究迭个生活，只是讲拨侬听几个裁判专家额意见。喏，再回到迭只点球额建立过程当中，申花队可以去捉捉扳头额倒是对方外援背身接球额辰光是勿是有手球。

S：噢，对呃对呃，侬搿能一讲我也想起来了，好像是真呃喏……个么申花队会得去投诉吗？

我：投诉应该是会得投诉吗……但是比赛已经结束了，结果是勿可能改变呃……顶多就是下趟比赛额辰光裁判会得考虑到今朝迭个情况，稍微手下留情吗？实际廊我觉着今朝额主裁判艾堃还算可以呃，否则上半场马莱莱一脚蹬了人家小腿廊厢，老早就是红牌罚下去来……

S：嗯，迭个倒是呃，当时辰光我第一反应也是要死快来，马莱莱又瞎来来了……没想到主裁判居然只拨了伊一张黄牌！

我：就是呀，假使当时辰光马莱莱马上拨红牌罚下去，申花队变成10打11，后头比赛会得变成哪能也就没人晓得来……