超级碗超级贵超级疯

娄一晨

上周，出差北京。顺便约了两个老友见面吃饭，都是上海人。饭桌上自然少不了要聊一聊过年的安排。

L：老娄啊，今年过年忙勿啦？

我：当然咯……侬晓得额呀，我么越是到逢年过节越是转播多呀……喏，今年么，年初一夜到就有一场英超，年初三上半天超级碗，年初四夜到还有一场亚冠……

S：哦，还有超级碗啊？就是伊个美国春晚？侬老早一直到现场去额？

我：是呀……当时辰光我代表东方卫视、五星体育连牢去了12年。伊个辰光每趟跑进美领馆去办签证，里厢眼美国签证官看牢我侪恨了勿得了……哈哈哈……

L：废话！伊拉当然要恨侬呃咯……我蹲勒美国额辰光，几个美国朋友侪帮我讲过超级碗个票子覅太抢手噢……侬首先要是自家球队个套票观众，然后侬自家个球队打进超级碗了侬才有资格去抽签买超级碗门票……而且美国人帮我讲超级碗门票贵了勿得了。

我：呒错，今年额票价已经创造最高纪录了，均价超过9800美元！最便宜额票子还要毛7000美元……

S大惊，一口茶差点喷出来：啊？均价9800美元？美国人疯脱啦？

我笑了：我老早勿是帮侬讲过啊，美国老百姓平常少喫一顿饭覅紧额，但是少看一场球，尤其是少看一场超级碗，是要出人性命额……以今年为例，1月份里厢正好是NFL橄榄球季后赛，闹猛啊，每个礼拜周末侪是淘汰赛重头戏。侬晓得收视率多少高伐？

两位老友同时问：多少高？

我拿出手机查找：喏，迭个是上个礼拜天（1月28日）两场联盟冠军赛个数据。两场比赛，两家电视台转播，从下半天到夜里厢。堪萨斯城酋长17比10胜巴尔的摩乌鸦，下半日3点钟开始，收视率25.5%，观众5550万。旧金山49人34比31胜底特律狮，夜到6点40分开始，收视率25.1%，观众5630万。美国人口一共也只有3.3亿。

L：个么就是旧金山49人、堪萨斯城酋长进超级碗了咯？怪勿得超级碗门票卖了介贵，旧金山湾区有钞票人是多呀……

我：还有来，今年超级碗摆了啥地方举行？拉斯维加斯呀……离开旧金山多少近啦？