屋里有个“好评师”

文/余 平

前几天阿爸辣网浪购买了一双黑颜色个皮鞋，收到货以后伊试穿了一下，觉得不适宜，仔细看了看，发现店家发错尺码了。我对伊讲：“搿能家个网店太勿负责了，做事体马马虎虎，侬一定要给伊一个差评。”阿爸笑了笑，呒没讲啥。过脱几天，我辣网上看到阿爸居然给搿家网店一个四星好评，我勿理解，就问阿爸为啥搿能做，阿爸笑嘻嘻讲：“搿家网店一个月要卖出三千多双鞋子，出点差错也是难免嗰，人家已经诚恳道歉，阿拉协商好了，搿双鞋子可以换，店家负责运费，既然对方态度诚恳，我当然要给好评，扣脱一星是因为毕竟出错了，我拿过程写清爽了，也是对其他消费者个提示。”“但是搿能寄来寄去总归是一桩麻烦事体，侬本来可以早点穿到合脚个鞋子个呀！”我讲。“覅紧，覅紧，早穿几天晚穿几天呒没啥区别。”阿爸边讲边摇手。

因为搿桩事体，阿拉屋里一致同意授予伊“好评师”个头衔，阿爸听了还有点得意。

上个礼拜天，外面落大雨，姆妈不方便出门买菜，到了中浪向，阿爸就为大家点了外卖。呒没想到，左等右等，约定个送货辰光已经过脱一个多钟头了，外卖仍旧呒没送过来。我饥肠辘辘，连声讲：“我要投诉搿个送餐员，给他差评，迟到介许多辰光，真是勿拿顾客当回事。”阿爸对我摇摇手，讲：“覅急覅急，饭总会送过来嗰。”等外卖送到了，阿爸呒没指责送餐员迟到，相反给了送餐员一个好评，还辣评价留言里感谢送餐员。我愤愤不平，对阿爸讲：“搿个送餐员耽误了阿拉吃饭，侬哪能还给伊好评呢？”“侬呒没看到伊即使穿了雨衣还是被淋得浑身汤汤渧？你呒没看见伊眼睛里个歉意吗？我从伊手里拿外卖个辰光，伊个手是冰冰冷嗰。”阿爸又讲：“搿个小伙子辣城市里打拼勿容易，一个差评就相当于白忙半天，阿拉还是对人家宽容点吧！”阿爸个言话也打动了我，伊拉这辈子真个是待人真诚，心地善良，处处为别人着想。

前几天阿拉搿栋楼个物业管理员小黄拿了一张物业服务评价表挨家挨户敲门，请业主为伊打分。阿拉拿到评价表以后，我和姆妈侪主张拨小黄一个中评，理由是阿拉向伊投诉过一楼开餐馆，油烟噪声扰民个事体，但是一直得勿到解决。阿爸却坚持拨小黄好评，阿爸也说出了伊个理由，总个来讲小黄对业主个物业服务还是蛮尽心尽力嗰，每天侪可以看到伊辣楼里忙东忙西，至于一楼餐馆油烟噪声扰民个事体，小黄也好几次寻餐馆老板协调，甚至还因此拨餐馆里个人打了，小黄办事能力可能差点，但态度还是相当好嗰，毕竟伊是年轻人，社会经验少，应该拨伊一个好评，鼓励一下。阿爸个言话让阿拉连连点头，一致决定拨小黄五星好评。

回想我同阿爸辣一道个日脚，伊搿个“好评师”始终待人宽容大度，搿种善良虽然呒没啥轰轰烈烈，但渗透了生活个方方面面。阿爸讲生活原本就是细微琐碎，做一个“好评师”，感觉蛮好，搿并勿是勿讲原则个退让，只是辣小事浪向多为别人想一想，予人玫瑰手有余香，不吝啬自家个好评，能辣风雨交加个日脚里温暖更多人个心。