人立山下看晚霞
文/沈一珠
搿两天，苏州人有福气了，木渎古镇，天平山浪，西北风稍许吹一吹，满山枫叶就红红火火了，远远交望过去，蓝天碧水，红叶铺天盖地。
实在是叫人去仔还想去，看仔放勿落。像阿拉几个外地人，特特为为赶到伊面，看一天，住一夜，覅以为迭能就算过足念头。喏，阿拉苏州同学阿季，扛仔照相机，早浪上班前头，去一沓，夜到下班后头，再去一沓。伊镜头下头个枫叶，也实在是灵光得勿得了：逆光里个枫叶，亮得通透，顺光里个枫叶，红得艳丽；或者有蓝天衬托，像红云朵朵；或者辣碧水里成倒影，像片片红霞。引得同学当中骚人墨客诗兴大发，一歇歇拨伊一句：“日拍红枫三百张，不辞长作天平人”；一歇歇又赞伊一首：“彼拍枫兮，一日不见，如三月兮；彼拍枫兮，一日不见，如三秋兮；彼拍枫兮，一日不见，如三岁兮。”
当年，范仲淹十七世孙范允临从福建运一批枫树种辣此地，一定是想让范家祖茔青山长绿。伊也肯定呒没想到，从此，就有了“天平红枫甲天下”个美名。
所谓前人种树，后人乘凉。天平山就是一例。
放大
上一版