文/黄顺福
最近上网看到有人遛白菜,让我想起小辰光骑竹马个事体。
讲起来,骑竹马是一种历史悠久个游戏,据说南宋辰光就有了。所谓竹马,其实就是一根细竹竿,长短1米左右。白相辰光,用两腿夹牢竹竿,一手扶竿头,竿尾拖辣地浪向,小步奔走。记得当年有小朋友觉得骑竹马还勿够威风,所以还要牵只宠物,结果有人牵一棵白菜,有人牵一根萝卜。我最威风,牵一只黄狼饭瓜。呒没想到拨阿奶看到,跑过来就打我一记头塔,讲:“要留种嗰,侬哪能拿黄狼饭瓜白相!”
黄狼饭瓜长得像根短棒,头小柄长,瓜子少,熟了以后表皮黄颜色,像煞一只黄鼠狼。记得有一趟,阿奶用黄狼饭瓜搭配大米、豆油、黄豆、一眼眼咸肉,烧了一镬子咸酸饭,结果我吃得撑牢了,味道实在太好。后来为了留种,阿奶拿黄狼饭瓜个瓜子搭稻草灰拌糊,裹仔湿烂泥,贴辣墙壁浪,伊讲迭能勿会变种,也勿会拨阿拉炒来吃脱。
据说饭瓜里有邪气丰富个果胶和微量元素,勿但能保护胃粘膜,加强肠胃蠕动,还能活跃人体新陈代谢、促进造血功能。黄狼饭瓜是饭瓜中个珍品,有“饭瓜大王”之称。前几天,朋友辣一家大饭店请客,上来一只菜,半圆形,黄橙橙,扣辣盘子里,大家侪勿认得。服务员上来用筷子一拨,外皮自家就落下来了。迭个是黄狼饭瓜特有个本事,呒没想到黄狼饭瓜摇身一变身价飙升。