记忆里个小世界游乐场

文/秦来来

6月中旬，因疫情和馆内改造而关闭个上海大世界再次开门迎客，虽然需要至少提前一天通过实名制预约订票，每天接待个游客也数量有限，但是还是有勿少老上海相约前往游玩。

阿拉小辰光，勿管是上海人，还是外地人，只要辣上海住过一段辰光侪晓得上海有一个“大世界游乐场”；另外一部分老上海，还晓得上海有一个“新世界游乐场”，“新世界”比“大世界”早开2年；但是讲起“小世界游乐场”，晓得个人就勿多了。

其实，“大世界”、“新世界”和“小世界”三家游乐场侪曾经是老上海名声响当当个娱乐场所。到今朝，沧桑百年，时移世易，“大世界”经过多次整修，仍旧还是上海邪气有名个游乐场，“新世界”脱胎换骨，已经变成气派非凡个百货商场，而“小世界”，历经起落，成了豫园小世界会所。

“小世界”始建于上世纪初，建筑采用西洋风格，并以其独特个西式建筑风格融入豫园飞檐翘角个建筑群中。这座建筑真是亭阁高耸，雕嵌玲珑，楼外有楼，平台宽敞，在屋顶上可东望萃秀堂，南观湖心亭，豫园胜景大部分侪能收入眼底。拿“老上海”个风情与魅力体现得淋漓尽致，是当时城里独一无二个古典欧式建筑。

“小世界”底层设大剧场，以演出京剧为主，人称“大京班”，二楼以上为小剧场和游艺厅，表演滑稽戏、绍兴戏、申曲、江淮戏、宁波滩簧、昆曲等，屋顶放映露天电影、评弹说书。当年，据说著名艺人筱文滨、施春轩等，侪辣此地演出过。当时“小世界”经常辣《申报》浪向做广告，号称是“华界最大游乐场”。还有资料讲，1922年11月13日，著名科学家爱因斯坦到访上海，曾经偕夫人到“小世界”看过苏州全福班演出个昆曲。

到了上世纪50年代，“小世界”个游艺功能基本消失，一度改为邑庙（南市）区文化馆，还开办过南市区戏曲学校。1960年，大公滑稽剧团辣“小世界”开办学馆，后来蛮有名气个王桂林、蔡剑英等侪是从此地毕业个。

当年南市区有新华京剧团、出新越剧团、群艺沪剧团等戏曲院团，除了新华京剧团有王少楼、李瑞来等名家，其他剧团大牌演员少，因此勿大为人所瞩目。

一直到1965年，当时正提倡知识青年到外地去、到农村去、到祖国最需要的地方去。电影《年轻的一代》，肖继业、林岚等银幕形象也给了青年人极大鼓舞。群艺沪剧团个吴鸿章一曲《打起背包走天下》一炮打响，连带群艺沪剧团大大地出了一次名。可以说，当年搿首曲子个流传广度绝不亚于如今流行歌曲辣年轻人中个传唱度。直到今朝，我还能唱得出来：“打起背包走天下，我们都听党的话。哪里需要我，哪里就是我的家。当年父兄闹革命，南征北战把江山打。今天革命重担我挑起，千难万难都不怕……”

1966年底以后，“小世界”摇身一变，成了上海市百货公司小商品批发部。