老早我管“互助金”

文/钱红春

上个世纪七十年代末，我辣厂工会工作，除脱一般抄抄写写，还管理“互助金”。

“互助金”是“职工互助储金会”个简称，是由职工一次交纳个会费同厂里行政拨款组成，由工会负责管理，借钞票拨职工克服屋里暂时个经济困难，体现了职工之间互助互济个精神。借钞票个手续邪气简单，只要辣借款单浪填写借款理由以及还款计划就好了，假使借个钞票呒没还清爽，就勿好再借。

我管“互助金”个辰光，碰着过勿少事体，其中一部分至今忘记勿脱。

陈师傅是厂里个机修技师，伊有四个小囡，老婆也勿工作，因为伊工钿高，日脚勿算推板，但随着小囡一个个长大，读书，开销就慢慢交紧张起来。有年学堂要开学，四个小囡一道读书，一记头拿勿出介许多钞票交学费，就来寻我借。因为伊要借个钞票超过规定额度，我就让伊去问问其他同事，借用别人个额度。伊讲伊侪问过了，勿是人家自家要借，就是钞票呒没还清勿好再借。出于同情，我就以自家个名头帮伊借了一点，借款扣辣我头浪，伊另外再还我。啥人晓得老婆查看我个工资单，看到“互助金”一栏里有扣款，就怀疑我外头有“花头”，我横解释竖解释，老婆还是勿相信，直到陈师傅帮我讲清爽，才还我清白。

小徐是从农村顶替伊拉爷进厂嗰，听讲参加“互助金”先要交一笔入会费，就随便哪能勿肯参加。原来，伊觉着自家呒啥负担，用勿着借钞票，还认为搿眼钞票存到银行里，多少还能拿到一点利息。勿晓得伊个退休回到乡下个爷老头子，有趟踏脚踏车到镇浪办事体，半路浪撞伤人家，治疗和赔偿要花勿少钞票，伊拿出全部家当也勿够。搿天伊哭出乌拉来寻我“想想办法”。因为伊呒没参加“互助金”，所以勿好借。后来还是单位里一个工会领导发声音，看辣伊爷老头子个面浪，从伊借款当中扣脱入会费用，帮伊渡过难关。从此伊一有空就到工会来帮忙，有一年还被评为“工会工作积极分子”。

小李当时要三十岁快了，还是单身，经济浪一向呒啥困难。有天伊来寻我借钞票，我当伊是开玩笑，想“嘲”伊两句。呒没等我开口，伊就一本正经对我讲，半年前头，人家为伊介绍了一位纺织女工，两个人谈得蛮热络。女朋友前两天告诉伊，讲弄到一张可以购买12英寸黑白电视机个票子，正辣筹钞票。小李马上“接翎子”，拍拍胸脯讲伊来想办法，算来算去还缺一眼，就来问我借。我提醒伊一定要牢靠，弄勿好会人财两空。伊讲伊有数，要是女朋友以后赖账，也算买个教训。又过仔半年，两家头终于牵手。伊后来才晓得，当初买电视机，其实是女朋友考验伊。结婚辰光，搿台电视机就成了女方个陪嫁。

应该讲，当年个“互助金”对稳定职工个家庭生活，提高职工工作积极性起到过勿小作用。后来改革开放了，大家个收入侪逐年增加，生活得到极大改善，再加上借钞票个渠道也越来越多，“互助金”也就逐渐消失了。