崇明金瓜味道好

文并图/沈一珠

崇明有交关好吃个物事，印象比较深个是白扁豆和青茄子。

交关年前头，有趟仔到崇明去白相，辣饭店里就碰着迭只白扁豆炒青茄子，青青白白，又好看又好吃。

结果就跑到酒店厨房间，叫伊拉第二天买菜辰光，帮阿拉带点青茄子和白扁豆回来。结果，伊拉真个帮阿拉买仔一麻袋。

乃么好，一道去白相个几家人家只好派代表带小朋友出去白相，大部分大人就孵辣酒店里剥白扁豆。否则，回去辰光，一人拎一大袋抛货，又是摆渡船，又要轧车子，阿要坍招势？

其实，崇明还有一样好吃个物事，而且好像只有崇明有，伊就是金瓜。金瓜外表光生，淡淡交个金黄色，长得像大号黄金瓜。

现在崇明物事买起来便当，交关菜场里侪会有一只专门窗口，卖崇明蔬菜。勿过，金瓜还是蛮难碰着。看到了，就买一只回来，过过瘾头。

金瓜好像就是一种吃法：葱油金瓜丝。只勿过，金瓜丝勿是切出来个，是刮出来个。

葱油金瓜丝个做法是迭能个：

用料：金瓜半只、葱、盐、油、糖各少许。

做法步骤：

1.金瓜去瓜瓤、瓜子，汏清爽，连皮摆辣开水里煮。

2.煮多少辰光是关键，煮过头，酥脱，金瓜丝变成金瓜泥；所以，煮五六分钟以后，就要用筷子轻轻交拨一拨瓜肉，假使可以刮出一缕缕丝了，马上拿瓜撩出来，浸辣冷水里。

3.等金瓜冷透，用筷子或者不锈钢调羹，辣瓜肉地方一刮，粗细均匀，晶莹剔透，金黄色个金瓜丝就出来了。丝丝缕缕纠缠辣一道，让人勿得勿惊叹，大自然个想象力实实交比人结棍。

4.金瓜丝里摆点细盐捏一捏，腌十分钟，让咸味道进去点。

5.然后水捏干，摆糖，熬点葱油淋上去，拌拌均匀就可以吃了。

大热天里，假使碰着一只金瓜，就豪燥买回去口伐！就迭能一二三，就是一道又好看又好吃个清爽小菜。