记忆里个卡带时光

文/赵妃蓉

现在大家听音乐个方式交关多，勿是单单自家听，还经常会分享拨别人，就连辣音频APP浪向开只个人电台也是交关便当个事体。辣阿拉小辰光，主要通过广播听音乐，还有就是磁带。现在个小朋友可能侪勿晓得啥是磁带，也从来呒没看到过。辣我小辰光对磁带最早个记忆是上世纪八十年代初，阿爸出国带回来一台索尼录音机、一大盒空白录音带。第一趟用录音机录音个辰光，我趴辣台子浪向盯牢转动个磁带看了交关辰光，因为我特别想晓得我刚刚讲闲话个声音是哪能跑到录音带里去嗰，搿盘录音带拨我放了又放，差点放坏脱。搿种好奇心超过了九英寸黑白电视机里个节目引起个好奇心，因为声音是呒没形状嗰，讲过么也就辣空气里飘散了。前几年看电视剧《风声》个辰光，看到王宝强演个盲人第一趟听到自家个声音跑进录音机，伊种兴奋让我特别有感触，想起老早自家也是迭能样子嗰。

对于小辰光交关物事个价钿我已经记勿清爽了，但是每盘磁带9.8元我记得特别牢，因为实在是太贵了，所以只有少数像蔡琴、张信哲、陈百强搿种我特别欢喜个歌手出个磁带我才会去买，因为要节约交关多辰光买早饭个铜钿才可以买一盒。埃歇辰光更多嗰是从广播节目里翻录，勿但因为空白磁带比有声磁带便宜，而且可以拿欢喜个节目录到一盘磁带里。听广播之前先准备好录音带，揿好录音键和暂停键，听到节目主持人要放歌曲了，马上揿一记暂停键，就可以一秒勿差录下来，否则因为启动录音键需要辰光，歌曲前奏就会缺少两秒。

埃歇辰光我录过电视剧《上海滩》、沪剧《雷雨》等等，自家用录音机翻录个磁带有天然个环境声，埃歇辰光觉得搿是一种缺点，呒没正版磁带听起来清爽，但是过了交关年数以后，保护得好个磁带还可以用。当我拿伊拉放进录音机里播放个辰光，听到“沙沙”个磁带转动声和当时个环境声，反而觉得特别珍贵，好像走进了时光隧道，一下子就被拉回到小辰光，声音个力量真是老强大嗰。最近我女儿去读大学了，我翻出伊刚刚读小学辰光老师要求录个英语朗读磁带，听到伊奶声奶气个童声，真个好像昨日重来。

当年市面浪还有一种外壳拨锯出缺口个磁带，据说是海关罚没品。搿种磁带侪是有声磁带，内容大多数是欧美音乐和歌曲，卖相勿灵，音质倒是勿受影响，我欢喜个QUEEN乐队、玛利亚·凯莉最早侪是通过搿种磁带听到嗰。

后来又有了双卡录音机，就是有两只卡仓个录音机，大家就开始交换翻录带，搿种磁带音质比较差，但是比买有声磁带便宜交关，还有人会拿唱词全部复印好。拿到欢喜个磁带，我经常孵辣阁楼浪，戴仔耳机跟唱，现在回想起来仍旧觉得蛮扎劲嗰。

当时好朋友之间送礼物，也流行互相送录好个磁带，我抽屉里现在还有中学同学送拨我个磁带，歌名之间串起来就是祝福，独一无二，真是既特别又感人，我一直珍藏到现在。

长大以后我去上海人民广播电台实习，第一趟做个节目是八一建军节特别节目，因为八月一日正好是我生日，所以节目播出个辰光我就守辣录音机旁边，拿搿期节目录下来，作为实习生活留念。虽然现在音频节目侪已经数字化，既有利于传播，也方便聆听，关于磁带个记忆已经越来越远了，但是辣我心底里，仍旧珍藏着和磁带有关个记忆，因为伊拉真真切切个记录了我美好个成长岁月，留下了岁月个印记……