大美羊肉汤

文并图/沈一珠

小美是只烧菜镬子。

啥物事侪好摆进去烧，朋友辣小美料理培训室里发出来个照片：从破壁压榨个豆浆、奶油小刀切馒头、煮西蓝花到红烧肉，统统是小美烧出来嗰。

一台子饭菜摆出来，山青水绿，呒啥烟火气。现在个人，要个就是低盐少油个健康，小美做到极致，价钿也蛮极致。

大美用来代指屋里烧饭个人。

勿管是男是女，只要肯顶着烟火气为屋里人煎炸蒸炒个人，侪称得上是大美之人。

只勿过，就是大美，也各有勿同。有个大美为营养健康，样样啥侪水里焯焯，隔水蒸蒸，顶多就是酱麻油拌拌；有个大美坚持爆炒香煎，讲，呒没嗞里嚓啦那一阵声响，淡而无味，一律勿美。

小美，还是大美？其实侪算勿上啥问题。

前两天到联谊餐室聚餐，吃着一只草头圈子，唉，现在想想咬一口汪进汪出个油，嘴巴里馋吐水还是潽进潽出。

倒想问问朋友，草头圈子迭种菜，小美烧得出来口伐？假使可以，又假使手头钞票有多，倒可以取小美回家。

冬天到了，天气冷，空气干。饮食上头以轻补滋润为主，比方，炖碗洋山芋羊肉汤。

只勿过，要勿要小美还辣考虑当中，眼门前迭份汤，是大美亲力亲为，所以，叫伊大美羊肉汤。

材料：羊肉7、8两，黄心洋山芋2、3只，生姜1块，花椒、盐各少许。

做法：羊肉切块焯水，与生姜、花椒包一道摆进汤镬子里，加水烧开，笃半个钟头左右；洋山芋切块摆到羊肉汤里，笃到洋山芋酥了，加少许盐调调味道，就好盛出来吃了。

羊肉暖中补气，生姜花椒去腥，又侪是挡寒气嗰；一碗羊肉汤，暖心暖身。