家常菜红烧南瓜

文并图/沈一珠

到一般饭店吃饭，或者当令当时，或者家常，比方讲红烧肉，有种地方加蛋，有种地方加豆腐干；比方讲干煎带鱼，有种地方用舟山带鱼，有种地方是朝鲜带鱼；总还是八九勿离十，家常之内，总能让肠胃服服帖帖。

也会有家常之外，让人猝不及防。

比方讲，上次到建德一家饭店吃饭，山里厢笋干多腌菜多，味道是好，只不过看到鸡毛菜，又一开心，想着个是屋里司空见惯个家常，一碗清汤挂面、碧绿生青个清炒鸡毛菜；结果端上来一看，始料未及：鸡毛菜好像暴腌过，切得细细碎碎，拌了香干末，又夹着煸炒得粒粒屑屑个肉糜，一大碗，蛮油腻。要求调，结果，再来一碗，还是切碎炒个腌过个鸡毛菜。

怪勿得人家，怪自家。要晓得，家常和家常老勿一样。

就像在湖南，一路白相到凤凰古城，进了饭店，请老板炒一碗清清淡淡个地地菜，之前问清了，地地菜就是上海人讲个荠菜。

结果，老板端上来个清炒里，热火朝天，躺着四、五支红艳艳个尖头辣椒。据说，这是湖南个家常，离开了辣椒，炒不来菜。

所谓入乡，就随俗。肠胃自有肠胃个包容性。

勿过，搿天同样个家常，却有一个忘不了个红烧南瓜。最常见个南瓜，切成半寸厚一寸宽一寸半长个长方块，带着皮，用油煎透了，加酱油烧软了，收干汁，浓油赤酱，端上来，像一碟红烧肉。

夹一块入口，酥软焦香，咸中带甜，肥而不腻。回来试了，只用生抽、老抽调味，总觉着味道像缺了一口气。问了同桌一道吃饭个，补充了料酒和南乳汁，再试了一趟，已经无限接近了那天个味道。要一式一样是不可能个，离了那乡，随不了那俗。

迭只红烧南瓜烧起来便当，侬可以试试看。

材料：南瓜1斤左右，生抽、老抽、黄酒、红乳腐汁（即南乳汁）、香葱各稍许。

做法：先拿南瓜汏清爽，不削皮，切成半寸厚一寸宽一寸半长个长方块，备用；然后开油锅，带皮那面朝下，煎到焦黄，淋黄酒，加水稍许，盖上锅盖，中小火焖烧10分钟左右；最后加生抽、老抽及南乳汁各少许，中小火再焖烧10分钟左右，开大火收干汤汁，出锅，撒点香葱，就可以上桌了。

烧菜搿种事体，其实也没啥一定之规，自家欢喜就好。比方讲，我第一次试烧个辰光，先加了新泡红茶焖烧，后加生抽入味，老抽上色，焖烧收汁就开吃，味道清淡，蛮好；假使侬喜欢味道更加浓一点，加点肉汤一道焖烧好了，一碗南瓜秒变红烧肉，也蛮好。