那些年值夜班

文/张四英

“夜班”对如今个年轻人来讲比较陌生。交关人辣大学里养成了晚睏个习惯，但大多勿会超过12点钟，整夜勿睏个味道更加呒没尝过。

四五十年前，上海还是一个工业城市，上夜班个人邪气多。石库门弄堂里有一项规矩，假使啥人家门口挂一张“请勿打扰”个牌子，就说明搿户人家屋里有人上夜班，白天需要困觉休息，小朋友做游戏个辰光就会避开搿户人家。我有一个同学从农场回沪以后进了一家纺织厂，伊一个弟弟辣钢铁厂工作，一个妹妹辣医院里当护士，伊拉屋里几乎天天有人上夜班，阿拉侪戏称伊拉屋里是“挂牌冠军”。

上世纪70年代初，我进了一家三甲医院药剂科上班，夜班也随之而来。阿拉个夜班辰光是夜里9点半到第二天早浪7点半，比较辛苦，所以全科个中青年轮流值班。按照当时个医疗制度，病人一般侪是先到单位里个医务室，再逐级转到三甲医院，所以夜里来看病个主要是急诊。埃歇辰光呒没夜班费，只多发一张夜餐券，需要自家到食堂去领。为了勿让病人久等，阿拉个夜饭也是从食堂拿回办公室吃嗰。因为常用个急救药急诊间里侪有，药剂科值班主要是为了应对突发事件，所以稍微离开一歇，辣窗口挂张“请稍等”个牌子就可以了。药剂科有一张单人木板床，呒没病人个辰光，阿拉后半夜可以辣木板床浪休息。值夜班最难熬个是凌晨2、3点钟，常常勿知勿觉就睏着了，但是走廊里一有脚步声，阿拉就会马上坐起来为病人配药。

医院规定，上夜班是勿准看小说嗰，埃歇辰光智能手机还呒没发明出来，所以微博、微信之类也是呒没嗰，为了赶走瞌睡虫，有辰光我会走出药房，穿过急诊间，到天井里仰望满天星斗和一轮明月，遐想古代诗人赏月作诗个情景“人攀明月不可得，月行却与人相随”……一阵救护车铃声由远而近，打断我个思绪，赶快回到岗位浪向。埃歇辰光医患关系邪气融洽，有眼经常来看毛病个老病人阿拉侪认得嗰，比如有一个病人经常哮喘发作，伊一到医院，就有相熟个护士帮伊挂号配药。

现在个医院通常是勿会停电嗰，因为供电部门会安排几条供电线路，确保医院个电力供应，但是当时城市供电缺口比较大，线路老化引起个故障也勿少，医院每年总归会碰着几趟停电。医院里有发电机，但发出来个电只够手术室等重点区域使用，急诊药房碰着停电就靠汽油灯照明。

如今上海到工厂上夜班个人越来越少，但每天夜里来医院个病人比当年多得多，值班医生呒没辰光串科室聊天了，急诊药房值夜班也勿许搭床了，辣大多数人安稳入睡个辰光，总有一部分人用自家个辛劳，守护搿座美丽城市个平安和宁静。