文并图/沈一珠
搿两天网浪买菜,看到一样新搭配:小葱香菜双拼,2.8元。
想想,哦,又到一年一度咬春个日脚了。饭台子浪,拌小素鸡、黄瓜、葱油萝卜之类嗰,可以淋点小葱香菜。
上海人好像呒没咬春习惯,“咬春”讲法主要辣北方。勿过,春天气息是可以辣饭台子上觉得着嗰。从前古人,简单点嗰,买根萝卜咬咬,萝卜有点辣蓬蓬,取“咬得草根断,而百事可做”个意思;考究点嗰摆春盘,正月初一,或者立春前后,用好看个盘子,装五样蔬菜:小蒜、大蒜、韭菜、菜苋和香菜。据说,迭五种菜味辛,吃了可以发五脏之气。所谓发五脏之气,基本浪就是提醒自家,又到春暖花开个辰光,可以提一提气,做事体去了,一年之计在于春嘛。
再后来就是吃春饼了。虽然蛮有可能还是春寒料峭个日脚,但月份牌浪,已经立春了呀。用面饼卷一眼春天个蔬菜,咬一咬,也算是迎接春天个一种仪式。
阿拉小辰光,是呒没听到过春饼,只晓得春卷。每年年夜饭,必有咸甜两种味道个春卷:咸嗰是黄芽菜、冬笋、肉、香菇切成丝烧个馅料,甜嗰是猪油豆沙馅。
用专门个春卷皮子包好,摆辣油里炸得刮辣松脆,是小辰光百吃勿厌个美食。
当然,所谓百吃勿厌,也是因为一年只有一趟,吃过仔,要牵记一年;摆辣现在,顿顿重油、重糖,侬试试看,会不会厌?所以,自家动手做份春饼,再夹点蔬菜,无论当早饭还是夜饭,侪像春风扑面一样,图一个新鲜。
春饼材料:面粉、水、油、盐以及各式蔬菜若干。
做法:先用开水掿面粉,掿到面粉团不软不硬,摆辣镬子里盖好,醒一醒;准备蔬菜,胡萝卜、芹菜、香菜、豆芽……挑各种新鲜上市个蔬菜,切丝切段,水里焯一焯,合好咸淡备用;拿面粉做成一个个小人拳头大小个面团,再摊成面饼,表面涂一层油;最后拿两只面饼重叠,用擀面杖擀成薄饼;平底锅放少量油,拿面饼摆进去,两面翻煎到微黄以后拿出来,一次可以做好两张薄饼,趁热拿两张饼撕开,拿配好个蔬菜裹进去,就可以咬啦。