老虎灶变成俱乐部

文/周允中

老虎灶，老底子是弄堂里每家每户泡热水个地方。为啥叫伊老虎灶呢？小辰光听来个一种讲法是因为看起来像！侬看：炉膛开辣正前方，好像老虎张开个嘴巴；灶台浪两只黑铁大锅，不断冒出热气，好像老虎瞪圆个眼睛；灶台后面高高翘起个烟囱，就是老虎尾巴了。

勿过，后来又听说过另外一种说法：因为灶头上有几只一年四季勿停烧热水个铁锅，所以有人就叫伊“老锅烧”，辣南方人个嘴巴里“锅”和“虎”侪是平声、“烧”和“灶”声音接近，辰光长了“老锅烧”就变成了“老虎灶”。

小辰光，弄堂斜对面，就有一爿老虎灶，炉膛里烧额是附近工厂厾脱个煤渣，所以价钿特别公道，装满一只大热水瓶只要一分洋钿，铜吊两分洋钿一壶。后来老板请来一位高手，辣灶台浪按照北斗七星个样子另外挖了几只小孔，号称“七星灶”，搿眼多出来个灶孔可以租拨附近居民蒸饭、烧粥、炖菜，因为火头猛、烧得快、价钿比自家屋里买煤球生炉子便宜，邪气受欢迎，搿家老虎灶也变得更加热闹了。

我曾经辣伊拉个灶房里泡过盆汤浴，大木盆里倒进半盆热水，人进去以后盆里个水正好满，汏盆浴邪气适宜。过脱一歇水冷下来了，只要喊一声：“老板娘，水冷了！”老板娘就会拿一瓶热水放辣浴布外面，再用一口纯正个淮扬话回答：“来了，辣搿块。”

除脱依托灶头和热水做生意，老板还动脑筋“跨界”经营，比如：买点两手零件拼凑出一辆两轮脚踏车，租拨附近个小朋友白相，租半个钟头只要三分洋钿，弄堂里个小囡争相租车，生意好得勿得了。

尝到了甜头，老板又辣弄堂里搭了一只棚棚，里向拉了一根电线，装了两只灯泡，摆了两副康乐球台，两个人白相一盘，输脱个人付一分洋钿，四个人白相一盘，输脱个人付两分洋钿。结果搿只“游乐场”邪气闹猛，经常有人打通宵。

又过了一段辰光，弄堂对面个房子拆迁了，变成了一片空地，老板看准机会又增加了滚铁圈和踩高跷游戏，一到礼拜天，来白相个小朋友交交关，空地浪人来人往热闹得勿得了。

老虎灶是阿拉小辰光个俱乐部，现在虽然已经消失，伊拨我个童年带来个快乐始终难以忘记。