搿种福勿好享

文/钱红春

老张三十来岁个儿子去年终于成家了。小夫妻住得勿远，走走也就十来分钟。考虑到儿子媳妇侪是“上班族”，又侪是从小娇生惯养个“独生子女”，勿大会买菜烧饭，再讲伊拉工作又忙呒没辰光，怕伊拉“饱一顿饿一顿”弄坏脱身体，想想自家搭老伴侪退休了，弄顿饭也勿算啥难事体，就叫伊拉每天下班后到自家屋里吃好夜饭再回去，省得自家再开伙仓。啥人晓得儿子媳妇一眼勿领情。老张摇摇头对我发牢骚：“现在条件多少好，真是有福勿会享。”

有日夜快点，我辣路浪碰着老张个媳妇小徐，顺便讲起搿桩事体。

小徐讲，伊成家后，爷娘怕伊笨手笨脚勿会“买汏烧”，也多次提出过帮伊料理家务，但侪被伊谢绝了。伊讲老人个好意能够理解，也交关感激，但是作为小辈，觉着爷娘为自家已经付出蛮多，现在年纪大了，能够健健康康，快快乐乐安度晚年，让伊安安心心工作，搿本身就是对伊最好个支持和帮助，哪能再好意思让老人为自家操劳呢？

伊又讲，伊同爱人侪是单位里个业务骨干，工作邪气忙，常常要加班，吃勿准啥辰光好下班，老是让老人为自家吃饭事体忙里忙外，左等右等，饭菜热了又热，实在讲勿过去。再讲自家呒没成家个辰光，覅讲困觉吃饭，就是吃口茶，老人也要横问竖问，作为小辈，虽然并勿情愿，但又怕老人伤心，所以只好顺从。现在自家长大了，成家了，能够独立生活了，真勿想爷娘再为自家操心。

伊还讲，成家以后，确实有交关家务勿会做，勿会做就学，反正早点晏点总要自家做嗰，总勿能一辈子依赖爷娘。否则个闲话，邻居会哪能看？同事会哪能讲？以后自家小囡懂事体了，又哪能教育好伊拉呢？伊接着讲：“勿是阿拉‘有福勿会享’，而是搿种福勿好享，勿敢享，也勿配享。”最后伊反问我：“爷叔，侬讲是勿是？”

我点点头，觉着伊个闲话蛮有道理。

小徐搿点闲话，后来我一五一十讲拨老张听，老张蛮感动。搿个辰光伊像突然想起点啥对我讲：“难怪伊拉两家头来看望阿拉常常勿打招呼，搭伊拉讲过交关趟数，来个前头要关照一声，伊拉一直勿改，大概就是怕阿拉忙进忙出准备伊拉吃饭太吃力。”随后又讲：“小夫妻早出夜归也蛮辛苦，难难板板来吃顿饭，弄几只小菜也是应该嗰。”我对老张讲，小囡现在大了，伊拉个心思，作为老人要体会，勿好像伊拉小辰光一样含辣嘴里，捧辣手浪，看上去是一片好心，其实是对自家教育培养子女个能力缺乏自信，也是对自家小囡勿相信。搿能一来，“独生”永远勿会“独立”。我最后讲：“其实有福勿会享个就是侬自家。”老张笑了。

搿点闲话勿晓得老张是勿是听进，反正我后来再也呒没听伊发过迭种牢骚。