文/钱红春
天气越来越热,勿管是衣裳,还是鞋子,侪到了换季个辰光,“五一”期间呒没啥事体,正好辣屋里整理一番。之前冷天穿个羽绒服搭仔羊毛衫打包以后送到干洗店里清洗,冷天穿个皮鞋因为已经穿过几年,鞋底磨损比较严重了,思来想去,准备厾脱以后买新嗰。迭个辰光,我忽然想起老早仔辣部队里穿过个解放鞋。
我是1962年参军嗰,新兵训练结束以后,分配到重炮连当炮手。我当年服役个部队里,战友来自五湖四海,每趟有人回乡探亲侪会带点土特产让战友们尝尝。而我上个世纪六十年代回上海探亲结束,归队个辰光,旅行袋里除脱五香豆、花生糖,还囥仔五双旧个解放鞋。
对于我迭个年纪个老人来讲,解放鞋是邪气熟悉嗰。搿是一种鞋底厚实耐磨,通体草绿色个胶鞋,半寸多高,鞋帮同鞋底连接个地方有一层橡胶,鞋面前头有层半圆形薄胶,鞋子里向个海绵垫弹性十足。解放鞋虽然勿大透气,容易捂出脚汗,但穿辣脚浪还是蛮适意嗰,而且勿管晴天还是落雨侪好穿,特别受户外工作个体力劳动者欢迎。部队里也是采购解放鞋作为军需品,当然军品解放鞋个质量比民用品好勿少。
当时部队里每年换发两双解放鞋,但是规定发新鞋个辰光必须上交旧鞋。据说,因为橡胶是战备物资,旧鞋子回收以后,橡胶可以重新利用。
每个班一门炮,每门炮配备一台牵引车,平常转移阵地或者长途行军,大家侪坐辣牵引车浪,所以鞋子磨损勿严重,每次换发新鞋子,上交个旧鞋子侪半新勿旧。有战友觉得旧鞋子还可以穿,舍勿得上交,就从驻地旧货店里淘来旧解放鞋充数。结果被司务长退回来了,因为民品解放鞋个原料比军品差得多,规定勿好替代。当时国家刚刚经历三年困难时期,经济还呒没根本好转,勿少农村来个战友家境贫困,有搿种想法可以理解。
辣我回上海探亲个前一天夜里,班长拿我拉到一边,讲伊打听到上海能够买到旧个军品解放鞋,托我帮伊带几双。我晓得班长就要复员回乡了,伊老家辣农村,屋里爷娘年纪大,做勿动生活,一个弟弟读中学,一个儿子刚刚会走路。一家门只有伊妻子可以下地挣工分,即使伊个部队津贴全部侪寄回去,屋里向个日脚仍旧过得邪气艰苦。我能够理解伊个想法。
回到上海以后,凡是有旧货店或旧货摊个地方我侪抽空去走了一遍,可惜根本呒没看到有军品解放鞋卖。有一天我到一位退伍战友屋里白相,聊天辰光讲起搿桩事体。就辣我准备归队搿天,搿位战友大清老早送来五双虽然旧,但汏得清清爽爽个军品解放鞋。据伊讲是从其他退伍战友手里收集来嗰。我回到部队,拿五双旧鞋子交拨班长,后来听说班长还匀了两双拨其他连队个老乡。
一晃五十几年过去了,现在想起来,心里有点酸楚,有点温暖。