“勿着落”有几种讲法

文/侯宝良

俗语“水中月镜中花”，就像成语“竹篮打水一场空”一样，侪是形容“勿着落”。摆辣上海闲话里，“阿拉”也有交关“嘻话”来形容迭排里现象！我就讲几句拨侬听听：

第一句是“黄伯伯”。“嗨，李师母侬托弄堂口个小皮匠做事体啊？乃么等于托拨‘黄伯伯’。”迭句闲话里个“黄”，勿是小皮匠姓“黄”，而是像花草枯脱发黄，变得“呒没”用场。搿是有人辣笑话李师母所托非人。

第二句是“握空”，也叫“握西空”。后楼阿婆招呼手舞足蹈个外孙来吃饭：“哎呀，侬搿算啥腔调，勿是辣握空嘛？”就是讲伊手舞足蹈，其实是辣瞎弄。

第三句是“屁招进”。有一天，后楼外孙问外婆：“阿婆，侬一早出去排队买到啥好物事啦？”外婆其实是白跑了一趟，面孔浪像刮仔浆糊，齁丝丝讲：“买个‘屁招进’！”外孙一听就懂，“屁”就是呒没，再跟“招进”两字，等于两手一摊“呒没买着啥物事”。

“十三月里礼拜七”，也叫“开年礼拜九”。每年只有十二个月，哪能会有十三月？每个礼拜七天，从礼拜一到礼拜六，第七天叫“礼拜天”或者“礼拜日”，根本呒没“礼拜七”和“礼拜九”个讲法？搿句闲话意思是等勿到搿天。

“盐钵头里出蛆”。大家晓得盐勿但是一种勿可缺少个调味品，还可以杀菌、消毒，所以盐钵头里是勿会生出蛆虫嗰。搿句闲话个意思就是“根本勿可能发生”。

“日里白讲、夜里瞎话”。隔壁王伯伯“日里白讲、夜里瞎话”，意思就是王伯伯欢喜瞎讲八讲，嘴巴里呒没真话。

“脚踏西瓜皮，滑到啊里是啊里”。迭个是讲某人工作勿负责任，做事体呒没计划。听听阿拉上海人平常头里个闲话，是勿是既形象生动，又有趣幽默啊？迭个就是地方文化个特色，哪能好失传呢？