老早被人“巴结”过

文/钱红春

一九六八年三月，我从部队复员进了一家工厂，到锅炉房当了一名司炉工。埃歇辰光锅炉侪是烧煤嗰，从早到夜灰天灰地，连鼻头里也是乌黑个煤灰，心里难免有点勿适宜。勿过，后来流行做煤屑砖，我也过仔一段被人“巴结”个日脚。

煤屑砖当时之所以会流行，是因为埃歇辰光交关人家住房极度困难。就拿我来讲，屋里大小四个人，住辣七平方米个亭子间里，但是按当时标准，人均1.5平方米以下才算困难户，我还排勿上号。厂里有点住辣附近棚户区个同事，勿但房子小，而且落雨天“外头落大雨，屋里落小雨”。有人就想利用房前屋后个空地搭间棚屋，改善居住条件。当时建筑材料基本买勿到，就算有少量供应，也只够补补屋顶漏水个缝道，塞塞墙浪透风个洞眼。勿过，办法总比困难多，有人就想到利用气焊产生个电石污废料，同煤屑按一定比例搅拌，灌到自家做个砖头模子里，晒干做成煤屑砖，用来搭棚棚。

然后么，锅炉房烧过个煤渣就变成“紧俏货”了，阿拉搿点司炉工也一下子“风光”起来。老早一眼走过锅炉房侪要蒙面孔、捂鼻头、一路跑步、避开煤灰个人，搿辰光一下班勿仅嘴巴里师傅长师傅短，还主动帮忙拉煤出灰。到了吃饭辰光，还会帮忙排队买饭买菜，甚至有人还会暗暗交塞两张紧俏个电影票。伊拉搿能“巴结”就是想多拉几车煤屑，好多做几块煤屑砖。

厂里搿点煤屑老早是要花钞票请人清运嗰，现在职工抢辣要，勿但可以省脱清运费用，还能帮助职工解决点困难，所以厂里领导交关支持。我有一位同事，就是用自家做个煤屑砖，辣自家个墙头边浪搭仔一间十来平方米个棚屋，看上去蛮像样子，结束了同两个小囡同困一张床个日脚。

勿过么，自家做个煤屑砖总归勿大牢，尤其是经勿起风雨，再讲后来政府为解决居民个住房困难，加大了住房建设个投入，对住房分配制度也进行改革，制定了一系列政策措施，鼓励企业自建住房分配拨职工，所以呒没多少辰光，自家做煤屑砖个风头就过去了，阿拉搿段拨人“巴结”个日脚也终于到头了。