白酒酿炖乌骨鸡

文并图/沈一珠

从前屋里附近有一家小菜场，菜场门口有一个卖酒酿个小弟，推一部黄鱼车，上头装三五甏酒酿，从早浪开始卖，卖光为止。

小弟个酒酿是零拷嗰，要多少，伊从甏里挖多少，装辣保鲜袋里，称分量卖；称之前，伊会先拿汤水沥沥干，称好仔再舀几勺汤水装进去。小弟个甏头酒酿吃起来甜甜糯糯，味道吃口侪正正好。

也有碰着勿巧，甏里酒酿卖得差勿多了，剩下来嗰，会觉着酒味有点多，有点涩嘴巴。

后来晓得，小弟是广西人，酒酿手艺是祖传嗰，每年第一场西北风刮起来个辰光，伊就来上海，租好房子，自产自销；一直到新年正月十五之后，伊也就回去了。

一直吃伊个酒酿，就算后来搬场了，有空还会弯过去，称两斤酒酿，过过念头。差不多十年工夫，小弟一点点变成爷叔，面孔浪多了沧桑，伊还是照式照样卖酒酿，一成勿变。有辰光想想，会有一点点伤感，有交关人侪迭能一成勿变过了一辈子。

搿天，网购一盒崇明桂花酒酿：早浪起来，挖小半碗甜酒酿，再烧一只溏心水潽蛋，连汤带水倒进碗里，蛋香加酒酿香，入味得勿得了，最后用一小只菜包子压一压甜味道，适适意意一顿早饭。

下半天，太阳晒得暖洋洋个辰光，挖几口酒酿，入口冷笃笃，软软糯糯，吃下去胃里热烘烘。

到了夜里，剩下来个酒酿里米酒味道越来越浓，索介用伊蒸一只乌骨鸡，温补。

食材：乌骨鸡半只，酒酿若干，米酒少许。

调料：红枣两三只，枸杞十几粒，盐少许。

做法：先拿乌骨鸡汏清爽，斩成块，我欢喜用盐搓一搓，腌入味后，蒸熟备用；红枣、枸杞汏好，泡软，备用。

砂锅或者汤锅里，酒酿铺底，蒸熟个乌骨鸡、红枣、枸杞一道铺辣酒酿浪，剩下来个酒酿汁水全部倒进去，浸没鸡块就可以了。酒酿汁水勿够，可以加点米酒。

大火烧开，改中火烧七八分钟就好了。酒香、米香、鸡香，贴辣镬底个酒酿居然还有点焦黄，邪气好吃。因为有酒酿了，饭也可以省脱，再配一小碗菠菜鱼丸粉丝汤，一顿夜饭就迭能样子了，适适意意，乐乐惠惠。