青青小松菜

文并图/沈一珠

小松菜，也叫日本油菜。据说迭种菜从前主要产地是日本江户小松川周边，所以，大家就叫伊小松菜了。其实，小松菜原产地是阿拉中国，19世纪70年代流传到日本，被广泛种植。

眼门前小松菜的长相介于小青菜和鸡毛菜之间，细细巧巧，老玲珑相；伊欢喜冷天，所以，是冷天里吃的小菜，天气越冷，叶子越厚，叶子里的甜度也会相应升高；只勿过，小松菜的甜味道里，夹了一点点苦味，搿倒跟阿拉上海冬天里吃的塌棵菜差勿多。

小松菜刚上市的辰光，手摸上去还是软熟的，鲜嫩的，所以，可以用开水煮一煮、拌拌吃，或者是用高温炒。无论是水里煮还是油里炒，速度侪要快，过头了，黏结结，吃口就打折扣了。

冷拌吃法顶能保持小松菜的原汁原味，新上市的小松菜比较适合迭种方法。汏清爽，整理成叶、梗以及菜心三部分，水烧开，先放梗，10秒钟左右，再放叶、菜心，一道再煮10秒钟左右，捞出来沥干，勿要捏干水分；然后，少许生抽、色拉油、盐、糖合好酱汁，菜摆进去浸一歇，再吃，有糯糯的香气，入口后，还有若有若无的苦味，会让人变得精神；也可以撒点白芝麻进去，简简单单的小菜，味道会变得更加有意思。

上市以后过段辰光，小松菜也会变老，搿辰光油炒会更加合适。一样道理，油热了，先放梗，再放叶、菜心，翻炒均匀后，加一点点水，大火，迅速翻炒，加盐、少许糖合好味道就好了。

比较遗憾的是，小松菜好像勿是日日有，前两天倒是买着一把，后来，再没有看到过伊。