为看滑稽戏 情愿饿肚皮

微信扫码看视频 听钱程沪语朗读

◆ 周爱民

60多年前，我十三四岁，屋里有只无线电，每到吃夜饭辰光，会播放滑稽演员演个独脚戏。我顶欢喜听杨华生个节目，因为伊讲得有声有色，蛮噱、蛮滑稽嗰。

一日中浪向，我一家头买票进了离屋里勿远个大世界。照一照笑痛肚皮个哈哈镜，随后打算看电影。走过环形走廊，看到橱窗里向有十几张老大个戏照，仔细一看，发现是大公滑稽剧团演个滑稽戏《苏州二公差》，里向就有杨华生演个人物。虽然我从来呒没看到过杨华生本人，但还是认得出伊嗰，因为勒阿拉弄堂对面有一爿画室，画室墙面浪挂仔交关名人画像，有国画泰斗齐白石、电影明星赵丹、滑稽名家杨华生咾啥。因为经常看到表情蛮滑稽个杨华生画像，我就记牢伊个面孔特征了。

戏照勒了橱窗里展出，说明迭部戏已经勒大世界演出了。我老早就想亲眼看看杨华生表演个滑稽戏，呒没想到今朝运道介好，勒搿搭碰到伊个演出，马上决定去寻伊表演个地方。我从底层噔噔噔奔到二楼，又上三楼、四楼，各个场子个节目牌浪侪呒没滑稽戏《苏州二公差》。咦，倒蛮滑稽嗰。

迭个辰光有一个胖笃笃个爷叔告诉我，近来杨华生迭班人马是勒大世界共舞台演《苏州二公差》。我拨伊讲得糊里糊涂，心里想，迭个爷叔勒了瞎三话四，拿我当洋盘，大世界搭共舞台明明是两个地方，勿搭界嗰。胖爷叔笑嘻嘻讲：小阿弟，搿侬就勿晓得了，从马路外头看，大世界搭共舞台隔开五六间门面，其实里向只有一墙之隔，现在迭面墙已经打通了，装了一扇门，进出共舞台好像穿弄堂一样便当。我好奇地问：葛末门勒啥地方呢？胖爷叔热情指点我：喏，侬看，露天舞台东面，阿是有勿少人进进出出啊。我点头称是，就问伊：难道里向就是共舞台？胖爷叔讲：对嗰呀。据伊讲，当时大世界搭共舞台是连勒一道统一管理嗰，邀请有名气个剧团来共舞台演出，让观众开开眼界，票价也斜气实惠，散场以后还可以回到大世界里来看其他节目。机会难得，侬覅错过噢。我拨伊讲得心里痒痒，连忙告辞，飞奔下楼，兴冲冲跑到门前，一脚刚跨进门槛，就拨一个工作人员拦牢，伊讲看《苏州二公差》还要另外买票。迭个辰光，我才发现附近有一只售票亭，旁边写得清清爽爽，票价一角。嘿嘿，我袋袋里向正好还有一角洋钿。

来大世界白相，我勿是单单为了看戏、看电影，本来还想尝尝老好吃个葱油饼，搿搭做个葱油饼又脆又酥，比外头做嗰好吃多了。我每趟来大世界，总要用一角洋钿买两只葱油饼当夜饭，慢品细尝，味道交关赞。现在我要是去看杨华生个滑稽戏，就勿好享受美味可口个葱油饼了，对我来讲，实在有眼勿舍得。

哪能办？看了“二公差”就呒没吃“葱油饼”，吃了“葱油饼”就呒没看“二公差”。是选“二公差”？还是“葱油饼”？是“葱油饼”？还是“二公差”？是二公差吃葱油饼？还是到苏州买二公差？想到滑稽里个绕口令，想到滑稽里个幽默，我还是舍勿得放弃看《苏州二公差》个机会，走到售票亭前头，手伸进裤子袋袋，一摸么感到勿对头呀，袋袋脱线脚，一角洋钿落脱了。触霉头，乃末真个要到苏州去买葱油饼唻。

就勒我垂头丧气个辰光，忽然从裤脚管里滑下来一张一角钞票，我马上拾起来，开心得勿得了，买票进了共舞台。

为看滑稽戏，情愿饿肚皮。