乡村顽童个零嘴儿

◆ 陈祖龙

一个甲子前，我住勒郊区。童年时代，屋里勿富裕，吃饱穿暖已属不易，零嘴儿是难得一见个。好在乡村皮小囡，可以勒田野河浜里寻到交关好吃物事，至今想来齿颊留香，魂牵梦萦。

柳树吐青时，叫来几个小伙伴，田间地头满地找茅草，找到了，蹲下细看，一根根笔直个茅茅针斜气可爱。拔起，小心撕开层层包裹，芯子里就躺着一条白嫩嫩个果肉，微甜清香，很有咬口。

小河岸边，高大个柳树枝杆虬突，树根入水，形成一道道不规则个罅隙，手指长短个青壳河虾顶欢喜躲勒里向。阿拉三五个皮小囡轻手轻脚走到河边，每人侪能摸到几只。迭种纯天然个绿色水中尤物，现在农贸市场勿但难般看到，价钿每斤也超过百元了。

有桑树个地方阿拉也经常光顾。四五月间，桑树上挂满了果子。由青变红，由红变紫，桑葚成熟了。枝叶间一串串硕大个桑葚果是阿拉个最爱。一把把捋下来，胡乱塞进嘴巴里，吃得满口生津，欲罢不能。

至于西瓜、黄金瓜、菜瓜、甜芦黍、黄瓜、西红柿等常见瓜果，想吃，随便到哪块地里摘就是了。乡里乡亲，谁也不会说闲话。小囡小肚皮，能吃多少？

乡村顽童个零嘴儿，至今难忘。